ဂါဇာကမ်းမြောင်ဒေသမြောက်ပိုင်းမှ ပါလက်စတိုင်းလူမျိုးများသည် မတ် ၂၅ ရက်တွင် ဟားမတ်စ်အုပ်စုကို ဆန္ဒပြခဲ့ကြကြောင်း သိရသည်။ အစ္စရေးနှင့် ဟားမတ်စ်အုပ်စုတို့အကြား စစ်ပွဲစတင်ခဲ့သည့် ၂၀၂၃ ခုနှစ် အောက်တိုဘာလ ၇ ရက် နောက်ပိုင်း ပထမဆုံးအကြိမ်အဖြစ် ပါလက်စတိုင်းလူမျိုးများက ဟားမတ်စ်အုပ်စုကို ဆန္ဒပြခဲ့ကြခြင်းဖြစ်သည်။ ဗီဒီယိုဖိုင်အထောက်အထားများအရ ဂါဇာမြောက်ပိုင်း ဟားမတ်စ်ဆန့်ကျင်ရေးဆန္ဒပြပွဲ၌ ပါလက်စတိုင်း လူမျိုး အရေအတွက်ရာနှင့်ချီ ပါဝင်ခဲ့ကြသည်။ အဆိုပါဆန္ဒပြပွဲတွင် ဆန္ဒပြသမားများက ဟားမတ်စ်အုပ်စုကို အကြမ်းဖက်သမားများအဖြစ်ဝေဖန်၍ ဂါဇာကမ်းမြောင်မှထွက်သွားရန် တောင်းဆိုခဲ့ကြသည်။ ၁၈ လကျော် ကြာမြင့်နေပြီဖြစ်သော ဂါဇာစစ်ပွဲအတွင်း ပါလက်စတိုင်းလူမျိုး ဦးရေ ၅၀,၀၀၀ ကျော် သေဆုံးခဲ့ရပြီး ဂါဇာဒေသတစ်ခုလုံး ပျက်စီးခဲ့ရသည်။ ဟားမတ်စ်အုပ်စုသည် ပါလက်စတိုင်းလူမျိုး ၂ ဒသမ ၁ သန်းနေထိုင်သော ဂါဇာကမ်းမြောင်ဒေသကို ၂၀၀၇ ခုနှစ်တွင် စတင်ထိန်းချုပ်ခဲ့ခြင်းဖြစ်ကြောင်း သိရသည်။