ရုရှားရေတပ် ပစိဖိတ်ရေတပ်အုပ်စုမှ ရေငုပ်သင်္ဘောတစ်စီးသည် ဂျပန်ပင်လယ်ဒေသ၌ စစ်ရေးလေ့ကျင့် မှုများပြုလုပ်နေကြောင်း ရုရှားမီဒီယာများက သတင်းထုတ်ပြန်ထားသည်။ အူဖာအမည်ရှိ ရေငုပ်သင်္ဘောသည် ဂျပန်ပင်လယ်၌ စစ်ရေးလေ့ကျင့်မှုအတွင်း ပင်လယ်ပြင်နှင့် ကမ်းရိုးတန်းပစ်မှတ်အတုများကို ကာလီဘာ အမျိုးအစား ခရုစ်ဒုံးကျည်များဖြင့် ပစ်ခတ်ခဲ့ကြောင်းသိရသည်။ အူဖာရေငုပ်သင်္ဘောက ပစ်လွှတ်ခဲ့သော ကာလီဘာခရုစ်ဒုံးကျည်များသည် ပစ်မှတ်အားလုံးကို တိကျစွာထိမှန်ခဲ့ကြောင်း ရုရှားကာကွယ်ရေးဝန်ကြီးဌာနက သတင်းထုတ်ပြန်ထားသည်။ အူဖာရေငုပ်သင်္ဘောသည် ကမ္ဘာပေါ်၌ စက်သံအတိုးတိတ်ဆုံး ရေငုပ်သင်္ဘောတစ်စီးအဖြစ် သတ်မှတ် ခံထားရသော ရေငုပ်သင်္ဘောဖြစ်သည်။ ရုရှားရေတပ်သည် အူဖာရေငုပ်သင်္ဘောကို ၂၀၂၂ ခုနှစ် နိုဝင်ဘာလတွင် စစ်ရေးလှုပ်ရှားမှုများအတွက် စတင်အသုံးပြုခဲ့သည်။ ကိုယ်ထည်အလျား ၇၄ မီတာရှိသော အူဖာရေငုပ်သင်္ဘောသည် အလေးချိန် တန် ၃,၉၀၀ ကျော်ရှိပြီး ရေအနက် မီတာ ၃၀၀ ထိငုပ်ဆင်းလှုပ်ရှားနိုင်ကြောင်း သိရသည်။