ကရင်ပြည်နယ်၊ ဘားအံမြို့နယ်ရှိ အထင်ကရနေရာတစ်ခုဖြစ်တဲ့ ဇွဲကပင်တောင်မှာ မတ်လ ၂၃ ရက် ညနေပိုင်းကစတင်ကာ တောမီးလောင်ကျွမ်းမှုဖြစ်ပွားခဲ့ပြီး မတ်လ ၂၅ ရက်မှာ မီးလောင်မှုအခြေအနေကို ထိန်းချုပ်ထားနိုင်ပြီဖြစ်တယ်လို့ ကရင်ပြည်နယ်၊ ဘားအံခရိုင်မီးသတ်ဦးစီးဌာနကနေ သိရပါတယ်။ အဆိုပါတောမီးဟာ မတ်လ ၂၃ ရက်မှာ ဇွဲကပင်တောင်အနောက်ဘက်ရှိ လုမ္ဗိနီဥယျာဉ်ဘက်မှ နေ့လယ် ၁၂ နာရီခန့်မှာ စတင်လောင်ကျွမ်းခဲ့တာဖြစ်ပြီး ညနေ ၆ နာရီနောက်ပိုင်းမှာ ပိုမိုလောင်ကျွမ်းခဲ့တာဖြစ်ပါတယ်။ တောမီးလောင်က ဘားအံမြို့နယ်၊ တော်ပုံကျေးရွာ၊ ဒန့်သလွန်ဘုန်းကြီးကျောင်း အနောက်ဘက်နဲ့ ဇွဲကပင်ဟိုတယ် အနောက်ဘက် နှစ်နေရာမှာ ဇွဲကပင်တောင်ခြေမှ အမြင့်ပေ ၅၀၀ ခန့်အထိ လောင်ကျွမ်းခဲ့ကြောင်း မြန်မာနိုင်ငံ မီးသတ်တပ်ဖွဲ့က ထုတ်ပြန်ထားပါတယ်။ ယခုအကြိမ်တောမီးလောင်ကျွမ်းမှုက ယခင်နှစ်တွေကထက် ပိုမိုများပြားခဲ့ပါတယ်။ ဇွဲကပင်တောင်ရဲ့ ပေ ၂၀၀ အထက်ကနေကျလာတဲ့ မီးဆွယ်မီးပွားတွေဟာ တောင်ခြေမှာရှိတဲ့ ဟိုတယ်၊ တည်းခိုခန်းတွေနဲ့ ရာဘာခြံတွေကို မီးမကူးစက်စေရန် ဘားအံမြို့နယ် မီးသတ်တပ်ဖွဲ့နဲ့ အရပ်ဘက်ပရဟိတ မြန်မာနိုင်ငံလူမှုကယ်ဆယ်ရေးအဖွဲ့တို့ ပူးပေါင်းပြီး ငြှိမ်းသတ်ခဲ့ရကြောင်း ဘားအံခရိုင်၊ မီးသတ်ဦးစီးဌာနမှသိရပါတယ်။(NVS 004)