မြန်မာနိုင်ငံဆီစက်ပိုင်ရှင်များအသင်းမှကြီးမှူးပြီး လမ်းမတော်နှင့် ရန်ကင်းမြို့နယ်တို့တွင် ဆီပိဿာချိန် အကန့်အသတ်မရှိဝယ်ယူနိုင်တဲ့ ပြည်တွင်းဆီစက်များက သင်္ကြန်အကြိုဈေးရောင်းပွဲတော်ကို ကျင်းပပြုလုပ်သွားမည် ဖြစ်ကြောင်း မြန်မာနိုင်ငံဆီစက်ပိုင်ရှင်များအသင်းမှ သိရပါတယ်။ ရန်ကုန်မြို့၊ လမ်းမတော်မြို့နယ်ရှိ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI)နှင့် ရန်ကင်းမြို့နယ်ရှိ ရန်ရှင်းလမ်းမပေါ်တို့တွင် အဆိုပါဈေးရောင်းပွဲတော်ကို လာမည့်ဧပြီလ ၂ ရက်မှ ၅ ရက်အထိ ကျင်းပပြုလုပ်သွားမှာဖြစ်ပြီး မြေပဲဆီ၊ နှမ်းဆီနဲ့ နေကြာဆီများကို ရောင်းချပေးသွားမှာ ဖြစ်ပါတယ်။ ဈေးရောင်းပွဲတော်အတွင်း မြေပဲဆီ၊ နှမ်းဆီနဲ့ နေကြာဆီများကို တစ်ပိဿာလျှင် ငွေကျပ် ၁၇,၀၀၀ နှုန်းနဲ့ ရောင်းချပေးမှာဖြစ်ပြီး ဆီပိဿာချိန် အကန့်အသတ်မရှိဝယ်ယူနိုင်မှာ ဖြစ်ပါတယ်။ ဈေးရောင်းပွဲတော်ကျင်းပရခြင်းမှာ ပြည်ပမှတင်သွင်းတဲ့ စားသုံးဆီများနှင့် ပြည်တွင်းထုတ် မြေပဲဆီဈေးနှုန်းများက ယခင်လိုဈေးနှုန်းကွာဟမှု များစွာမရှိတဲ့ အတွက် ကျန်းမာရေးနှင့်ညီညွတ်သည့် မြေပဲဆီ၊ နှမ်းဆီ၊ နေကြာဆီတို့ကို ပိုမိုစားသုံးစေလိုသည့် ရည်ရွယ်ချက်များဖြင့် ဈေးရောင်းပွဲတော်ပြုလုပ်‌ကာ ရောင်းချပေးခြင်းဖြစ်ကြောင်း သိရပါတယ်။ ဒါ့အပြင် မြန်မာနိုင်ငံဆီစက်ပိုင်ရှင်များအသင်းအနေဖြင့် ပြီးခဲ့တဲ့ ၂၀၂၄ ခုနှစ်၊ ဩဂုတ်လမှစတင်ကာ ပြည်တွင်း ဆီစက်များဈေးရောင်းပွဲတော်ကို ရန်ကုန်တိုင်းဒေသကြီးနှင့် မန္တလေးတိုင်းဒေသကြီးတို့တွင် ကျင်းပပေးခဲ့ပြီး ဖြစ်ပါတယ်။ (NVS 004)