ထိုင်းနိုင်ငံ၊ ဘန်ကောက်မြို့မှာကျင်းပမယ့် STYLE Bangkok 2025 ပြပွဲကြီးမှာ မြန်မာနိုင်ငံက ကုမ္ပဏီအချို့ လည်း ပါဝင်ပြသသွားမှာဖြစ်တယ်လို့ ပြပွဲကျင်းပရေးကော်မတီကနေ သိရပါတယ်။ အဆိုပါပြပွဲကို ထိုင်းနိုင်ငံ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနရှိ နိုင်ငံတကာကုန်သွယ်မှုမြှင့်တင်ရေးဦးစီးဌာနက စီစဉ်ကျင်းပတာ ဖြစ်ပြီး ထိုင်းနိုင်ငံကုန်သွယ်မှုဘုတ်အဖွဲ့နဲ့ ပူးပေါင်းထားဆောင်ရွက်ခဲ့တဲ့ ပွဲတစ်ခုလည်း ဖြစ်ပါတယ်။ မြန်မာနိုင်ငံကိုယ်စားပြုအဖြစ် ယွန်းထည်၊ ဝါးအနုပညာ၊ ဝါးဒီဇိုင်းနဲ့ဆောက်လုပ်ရေး၊ ချည်ထုတ်ကုန်လုပ်ငန်း များကို ကုမ္ပဏီ ၄ ခုက ပြသသွားမှာ ဖြစ်ပါတယ်။ STYLE Bangkok 2025 ပြပွဲကြီးမှာ ပြခန်းပေါင်း ၅၀၀ ကျော်နဲ့ ပရိဘောဂ ပစ္စည်းပေါင်း ၈၀၀ ကျော် ပါဝင်ပြသသွားမှာဖြစ်သလို ထိုင်းနိုင်ငံထုတ် ထူးခြားတဲ့ဒီဇိုင်းတွေပါ ပြသသွားမှာဖြစ်ပါတယ်။ အဆိုပါပြပွဲကို (၈) ကြိမ်မြောက်အဖြစ် ကျင်းပတာဖြစ်ပြီး ဧပြီလ ၂ ရက်မှ ၆ ရက်အထိ ၅ ရက်တိုင်တိုင် ကျင်းပသွားမှာ ဖြစ်တယ်လို့ သိရပါတယ်။(NVS 004)