Signal group မှတစ်ဆင့် ဟူသီသူပုန်အဖွဲ့အပေါ် တိုက်ခိုက်မည့်အစီအစဉ် အသေးစိတ်အချက်အလက် များ ပေါက်ကြားမှုသည်လိမ်လည်လှည့်ဖျားမှုနှင့် သတင်းပေးပို့ခြင်း၏အရေးပါမှုကို လျော့ပါးစေခြင်းဖြစ်သည်ဟု အမေရိကန်ကာကွယ်ရေးဝန်ကြီး ပိဟက်ဆက်က ပြောကြားခဲ့ကြောင်း သိရသည်။ အမေရိကန်အစိုးရအဖွဲ့မှ အရာရှိကြီးများသည် ယီမင်နိုင်ငံရှိ ဟူသီသူပုန်အဖွဲ့အပေါ်ဆင်နွှဲမည့် တိုက်ခိုက်မှုများအကြောင်း ဆွေးနွေးသည့် Signal group ဟု အမည်ပေးထားသော မက်ဆင်ဂျာအဖွဲ့အတွင်းသို့ အယ်ဒီတာချုပ်တစ်ဦးဖြစ်သူ ဂျက်ဖရီ ဂိုးဘာ့ဂ် အား မှားယွင်းထည့်သွင်းမိခဲ့ခြင်းဖြစ်သည်။ ဂျက်ဖရီ ဂိုးဘာ့ဂ်သည် အမေရိကန်မဂ္ဂဇင်းကြီးတစ်ခုဖြစ်သည့် The Atlantic မှ အယ်ဒီတာချုပ်ဖြစ်ပြီး ၎င်းသည် ဒေါ်နယ်ထရမ့်အစိုးရအဖွဲ့မှ ဒုတိယသမ္မတဂျေဒီဗင့်၊ အမျိုးသားလုံခြုံရေးအကြံပေးမိုက်ဝေါ့နှင့် ကာကွယ်ရေးဝန်ကြီး ပိဟက်ဆက်ကဲ့သို့သော ထိပ်တန်းအရာရှိကြီးများပါဝင်သည့် Signal group အတွင်းသို့ မှားယွင်းထည့်သွင်းခံရခြင်းဖြစ်ကြောင်း မဂ္ဂဇင်းကြီးက မတ်လ ၂၄ ရက်တွင် ဖော်ပြသည်။ အဆိုပါ Signal group ကို အဖွဲ့အတွင်း၌ Houthis small group ဟု အမည်ပေးထားသည်။ Houthis small group အတွင်းပါဝင်သူ အရာရှိကြီးများသည် ယီမင်နိုင်ငံရှိ ဟူသီသူပုန်အဖွဲ့အပေါ်ပြုလုပ်မည့် လေကြောင်းတိုက်ခိုက်မှုအစီအမံများကို ဆွေးနွေးလျက်ရှိပြီး မတ်လ ၁၅ ရက်တွင် Pete Hegseth ဟု အမည်ပြောင်ပေးထားသည့် မက်ဆင်ဂျာ အဖွဲ့ဝင် တစ်ဦးက ဟူသီသူပုန်များအပေါ်တိုက်ခိုက်မည့် အသေးစိတ်အချက်အလက်များကို ပေးပို့ခဲ့သည်ဟု ဂျက်ဖရီ ဂိုးဘာ့ဂ် က ပြောကြားခဲ့ကြောင်း သိရသည်။ Houthis small group အတွင်းပါဝင်သည့်ထိပ်တန်းအရာရှိဦးရေမှာ ၁၈ ဦးရှိကြောင်း RT သတင်းဌာန ဖော်ပြချက်အရသိရသည်။