ပြည်ပနိုင်ငံအချို့မှ အစိုးရအဖွဲ့များသည် ယူကရိန်းပဋိပက္ခအား အဆုံးသတ်နိုင်ရေးကြိုးပမ်းမှုများကို အဟန့်အတားပြုလျက်ရှိသည်ဟု အမေရိကန်နိုင်ငံခြားရေးဝန်ကြီး မားကို့ရူဘီယိုက စွပ်စွဲလိုက်ကြောင်း သိရသည်။ အမေရိကန်သမ္မတဒေါ်နယ်ထရမ့်သည် ရုရှားနှင့်ယူကရိန်းနိုင်ငံတို့ကြား ဖြစ်ပွားနေသည့်ပဋိပက္ခကို အဆုံးသတ် စေရန်အတွက် သံတမန်ရေးအရ ကြိုးပမ်းလျက်ရှိသော်လည်း ယင်းကြိုးပမ်းမှုများသည် အခြားနိုင်ငံများမှ အစိုးရ အဖွဲ့များ၏ အတိုက်အခံပြုခြင်းများနှင့် ရင်ဆိုင်နေရသည်ဟု ရူဘီယိုက မတ်လ ၂၄ ရက်တွင် ပြောကြားသည်။ သို့သော် အဆိုပါနိုင်ငံများ၏အမည်များကိုမူ ထုတ်ဖော်ပြောဆိုခဲ့ခြင်းမရှိပေ။ ထို့ပြင် ယူကရိန်းပဋိပက္ခအား စစ်ရေးနည်းလမ်းအရမဟုတ်ဘဲ စေ့စပ်ဆွေးနွေးခြင်းအားဖြင့်သာ အဆုံးသတ်ရန်လိုအပ်ကြောင်း၊ ထိုသို့အဆုံးသတ် နိုင်ရန်အတွက်လည်း ရုရှားနှင့်ယူကရိန်းနိုင်ငံတို့မှ ထိပ်တန်းအရာရှိကြီးများအား ဆွေးနွေးပွဲသို့ အမေရိကန်က ခေါ်ဆောင်နိုင်ခဲ့ခြင်းကြောင့် သမ္မတဒေါ်နယ်ထရမ့်၏သံတမန်ရေးအရ ကြိုးပမ်းမှုကို ရူဘီယိုက ချီးကျူးပြောဆို ခဲ့သည်။ ယူကရိန်းပဋိပက္ခအား ဖြေရှင်းနိုင်ရေးအတွက် ရုရှားနှင့်အမေရိကန်အရာရှိတို့ကြား ၁၂ နာရီကြာ စေ့စပ် ဆွေးနွေးပွဲတစ်ရပ်ကို ဆော်ဒီအာရေဗျနိုင်ငံ ရီယက်မြို့၌ မတ်လ ၂၄ ရက်က ထပ်မံကျင်းပခဲ့ကြောင်း RT သတင်း ဌာန ဖော်ပြချက်အရ သိရသည်။