ပရီးမီးယားလိဂ်ကလပ်အသင်းများမှ တာဝန်ရှိသူများက နွေရာသီအပြောင်းအရွှေ့စျေးကွက်ကို ရာသီသစ် မစမီ ပိတ်သိမ်းရန် ဆွေးနွေးညှိနှိုင်းနေပြီး မဲခွဲဆုံးဖြတ်ဖွယ်ရှိကြောင်း သိရပါတယ်။ ပရီးမီးယားလိဂ်ပြိုင်ပွဲကို သြဂုတ်လလယ်ပိုင်းမှာ စတင်လေ့ရှိပြီး နွေရာသီအပြောင်းအရွှေ့စျေးကွက်မှာ သြဂုတ်လကုန်မှ ပိတ်သိမ်းခြင်းဖြစ်ပါတယ်။ ဒါကြောင့် ကလပ်အသင်းများရဲ့ ပြင်ဆင်မှုကို ထိခိုက်စေတဲ့အတွက် ရာသီသစ်မစမီ အပြောင်းအရွှေ့စျေးကွက် ပိတ်သိမ်းရန် လိုလားနေခြင်းဖြစ်ပါတယ်။ ပရီးမီးယားလိဂ်ရဲ့ ၂၀၁၈ နှင့် ၂၀၁၉ ရာသီများမှာ နွေရာသီအပြောင်းအရွှေ့စျေးကွက်ကို ရာသီသစ်မစတင်မီ ပိတ်သိမ်းခဲ့ပေမယ့် အခြားလိဂ်များက ပိတ်သိမ်းခြင်းမရှိခဲ့တဲ့အတွက် အဆင်မပြေဖြစ်ခဲ့ခြင်းကြောင့် နောက်ပိုင်းမှာ အခြားလိဂ်များနှင့်တန်းတူသာ ပိတ်သိမ်းခဲ့ခြင်း ဖြစ်ပါတယ်။ ယခုအခါရာသီသစ်မစမီ စျေးကွက်ပိတ်သိမ်းမှု ပြန်လည်ပြောင်းလဲရန် စီစဉ်နေခြင်းဖြစ်ပြီး လာမယ့် မတ်လ ၂၇ ရက်မှာ ပြုလုပ်မည့် ကလပ်အသင်းတာဝန်ရှိသူများအစည်းအဝေးမှာ မဲခွဲဆုံးဖြတ်ဖွယ်ရှိကြောင်း သိရပါတယ်။ ၂၀၂၅-၂၆ ရာသီပရီးမီးယားလိဂ်ပြိုင်ပွဲကို သြဂုတ်လ ၁၆ ရက်မှာ စတင်ကျင်းပမှာဖြစ်ပြီး ၂၀၂၅ နွေရာသီ အပြောင်းအရွှေ့စျေးကွက်ကို ရာသီသစ်မစမီ ၂ ရက်အလိုဖြစ်တဲ့ သြဂုတ်လ ၁၄ ရက်မှာ ပိတ်သိမ်းရန် ဆွေးနွေးနေခြင်း ဖြစ်ကြောင်း သိရပါတယ်။ ပရီးမီးယားလိဂ်မှာ ယင်းကဲ့သို့ အပြောင်းအလဲပြုလုပ်မည်ဆိုပါက ကလပ်အသင်းများ၏ ဆန္ဒမဲကို ရယူဆုံးဖြတ်ရခြင်းဖြစ်ပြီး ၁၄ သင်းရဲ့ထောက်ခံချက်ရရှိပါက အတည်ပြုနိုင်မည် ဖြစ်ကြောင်း သိရပါတယ်။ (NVS 008)