“မိုင်ယာမီအိုးပင်းမှာ မက်ဒီဆင်ကီးစ် ကို အာလာ အနိုင်ရ”
25 Mar
မိုင်ယာမီအိုးပင်းတင်းနစ် အမျိုးသမီးတစ်ဦးချင်း တတိယအဆင့်ပွဲစဉ်တစ်ပွဲအဖြစ် ယခုနှစ်ဩစတြေးလျ အိုးပင်းချန်ပီယံ မက်ဒီဆင်ကီးစ် နဲ့ ဖိလစ်ပိုင် ဆယ်ကျော်သက်တင်းနစ်မယ် အာလာ တို့ ယှဉ်ပြိုင်ခဲ့တဲ့ပွဲမှာ အံ့အားသင့် ဖွယ်ရလဒ် ထွက်ခဲ့တာဖြစ်ပါတယ်။ ကမ္ဘာ့အဆင့် (၅) နေရာမှာ ရပ်တည်နေသလို အခုပြိုင်ပွဲမှာလည်း ဆီဒင်အဆင့် (၅) ရထားတဲ့ မက်ဒီဆင်ကီးစ် အနေနဲ့ အသက် ၁၉ နှစ် သာရှိပြီး လက်ရည်စစ်ပွဲကနေတစ်ဆင့် အခုပြိုင်ပွဲကို ဝင်ပြိုင်ခွင့်ရခဲ့တဲ့ အာလာ ကို အလွယ်တကူ အနိုင်ရလိမ့်မယ်လို့ ထင်ခဲ့ကြပေမယ့် ပထမပွဲလတ်မှာပဲ အာလာ က အနိုင်ရခဲ့လို့ မက်ဒီဆင်ကီးစ် အနေနဲ့ ဖိအားများသွားခဲ့ပါတယ်။ ဖိအားတွေနဲ့အတူ ပုံမှန်လက်စွမ်းပျောက်ဆုံးခဲ့တဲ့ မက်ဒီဆင်ကီးစ် ဟာ ဒုတိယပွဲလတ်မှာလည်း ထပ်မံရှုံး နိမ့်ခဲ့တဲ့အတွက် ပြိုင်ပွဲကနေ ထွက်သွားခဲ့ရတာ ဖြစ်ပါတယ်။ ဖိလစ်ပိုင်တင်းနစ်မယ် အာလာ က ၆း၄၊၆း၂ဆိုတဲ့ရလဒ်နဲ့ အနိုင်ရခဲ့တာဖြစ်ပြီး အခုနိုင်ပွဲက သူမရဲ့ ကစားသမားဘဝ အကြီးမားဆုံးနိုင်ပွဲတစ်ခုလည်း ဖြစ်ပါတယ်။ အာလာ ဟာ ပြီးခဲ့တဲ့ဒုတိယအဆင့်မှာလည်း ဆီဒင်အဆင့် (၂၇) ရထားတဲ့ လတ်ဗီးယားတင်းနစ်မယ် အော်စတာ ပန်ကို ကို အနိုင်ရပြီး တက်ရောက်လာခဲ့တာ ဖြစ်ပါတယ်။ စတုတ္ထအဆင့်မှာတော့ အာလာ ဟာ ဆီဒင်အဆင့် (၁၀) ရထားတဲ့ စပိန်တင်းနစ်မယ် ဘာဒိုဆာ နဲ့ ဆက်လက်ရင်ဆိုင်ရမှာ ဖြစ်ပါတယ်။ (NVS 008)
