မကွေးတိုင်းဒေသကြီး၊ မကွေးမြို့မှာ မြန်မာ့သနပ်ခါးယဉ်ကျေးမှုဓလေ့ပြပွဲ၊ ပြိုင်ပွဲနှင့်ဆုချီးမြှင့်ပွဲကို မတ်လ ၂၃ ရက်နံနက်ပိုင်းက ကျင်းပပြုလုပ်ခဲ့ကြောင်း သိရပါတယ်။ အဆိုပါအညာဓလေ့သနပ်ခါးယဉ်ကျေးမှုပြပွဲမှာပြခန်းများ ခင်းကျင်းပြသထားပြီး မြန်မာ့သနပ်ခါးယဉ်ကျေးမှု ဓလေ့ပြိုင်ပွဲမှာ အမျိုးသမီးငယ်များမှ သနပ်ခါးလိမ်းခြယ်ပြိုင်ပွဲယှဉ်ပြိုင်ရန် သတ်မှတ်ထားသော အခန်းများမှာ သနပ်ခါးလိမ်းခြယ်နေမှုများနှင့် မြန်မာ့ရိုးရာသနပ်ခါးယဉ်ကျေးမှုဓလေ့ကို UNESCO ၏ လူသားမျိုးနွယ်ကိုယ်စားပြု ဒြပ်မဲ့ယဉ်ကျေးမှု အမွေအနှစ်အဖြစ်စာရင်းသွင်းနိုင်ရေး QR Code ကို Scan ဖတ်ပြီးဆန္ဒပြုနေမှုများနိုင်ရန် ပြုလုပ်ထားတာ ဖြစ်ပါတယ်။ မြန်မာ့သနပ်ခါးယဉ်ကျေးမှုဓလေ့ခေါင်းစဉ်ဖြင့်ကျင်းပခဲ့သော အလွတ်တန်းဆောင်းပါးပြိုင်ပွဲမှာ ဆုရရှိသူများ၊ မြန်မာ့သနပ်ခါးအလှမယ်ပြိုင်ပွဲများမှာ ဆုရရှိသူများနှင့် People Choice Award ပြိုင်ပွဲမှာ ဆုရရှိသူများကို မကွေးတိုင်းဒေသကြီးဝန်ကြီးချုပ် ဦးတင့်လွင် နှင့်တာဝန်ရှိသူများက ဂုဏ်ပြုဆုငွေနှင့် ဂုဏ်ပြုမှတ်တမ်းလွှာများကို ပေးအပ်ချီးမြှင့်ခဲ့ပါတယ်။ သနပ်ခါးပင်ကို မြန်မာနိုင်ငံ၊ သီရိလင်္ကာနိုင်ငံ၊ အိန္ဒိယနိုင်ငံ၊ ထိုင်းနိုင်ငံနှင့် ပါကစ္စတန်နိုင်ငံတို့မှာ တွေ့ရှိရပြီး မြန်မာ့သနပ်ခါးက အရည်အသွေးအကောင်းဆုံးဖြစ်ကာ မကွေးတိုင်းဒေသကြီးအတွင်း သနပ်ခါးအမျိုးအမည်များစွာ ရှိတဲ့အနက် ရှင်မတောင်သနပ်ခါးကို အများဆုံးစိုက်ပျိုးကြပြီး စိုက်ဧကပေါင်း ၄ သိန်းခန့်ရှိတယ်လို့ သိရပါတယ်။ (NVS 004)