“သင်္ကြန်ပိတ်ရက်နေရပ်ပြန်မည့်သူများ အဆင်ပြေစေရန် ကားလက်မှတ်များကို ပုံမှန်နှုန်းထားများနဲ့ဆောင်ရွက်ပေးမည်”
25 Mar
သင်္ကြန်ရုံးပိတ်ရက်ရှည်ကာလအတွင်း မန္တလေးမြို့မှ နေရပ်အသီးသီးသို့ပြန်ကြမယ့်ဝန်ထမ်းများ၊ ကျောင်းသား၊ ကျောင်းသူများနှင့် ခရီးသွားပြည်သူများ အဆင်ပြေလွယ်ကူစွာ သွားလာနိုင်စေရေးအတွက် ကားလက်မှတ်များကို ပုံမှန်နှုန်း ထားများနဲ့ အခက်အခဲမရှိစေရန် ဆောင်ရွက်ပေးသွားမည်ဖြစ်ကြောင်း မန္တလေးတိုင်းဒေသကြီး၊ အဝေးပြေးယာဉ်လုပ်ငန်းများ ကြီးကြပ်ရေးလုပ်ငန်းကော်မတီမှ သိရပါတယ်။ အဆိုပါမန္တလေးတိုင်းဒေသကြီး ယာဉ်လုပ်ငန်းများ ကြီးကြပ်မှုကော်မတီအနေနဲ့ အဝေးပြေးကားကွင်းရှိ ကော်မတီရုံး မှာ ဧပြီလ ၉ ရက်မှ ၂၁ ရက်အထိ ယာဉ်လိုင်းအသင်းများနှင့် ပူးပေါင်းကာ ကားလက်မှတ်အခက်အခဲရှိသူများကို ကူညီဆောင်ရွက်ပေးသွားမှာဖြစ်ပြီး မလိုလားအပ်တဲ့ ဆိုးကျိုးများနှင့် မှောင်ခိုရောင်းချမှုများ မဖြစ်ပေါ်စေရန် အွန်လိုင်းစနစ် နဲ့ ကားလက်မှတ် ကြိုတင်မှာယူမှုများကိုတော့ ဆောင်ရွက်ပေးမှာ မဟုတ်ပါဘူး။ ယခုနှစ်သင်္ကြန်ကာလအတွင်း မန္တလေးမြို့ မှ ပြေးဆွဲမည့် ယာဉ်အစီးရေကို ဧပြီလ ၉ ရက်မတိုင်မီ သိရှိစေရန် မန္တလေးတိုင်းဒေသကြီး အဝေးပြေးယာဉ်လုပ်ငန်းများ ကြီးကြပ်မှုကော်မတီက ယာဉ်လိုင်းအသင်းများထံမှ စာရင်းများ ကောက်ယူသွားမည်ဖြစ်ပြီး လက်ရှိတွင် မန္တလေးမြို့ရှိ အဝေးပြေးယာဉ်ရပ်နားစခန်းများမှ မြန်မာပြည် အထက်ပိုင်းနှင့် အောက်ပိုင်းဒေသများသို့ ယာဉ်အသင်းပေါင်း ၅၀၀ ကျော်နဲ့ ခရီးစဉ်များပြေးဆွဲပေးလျက်ရှိကြောင်း သိရပါတယ်။ (NVS 004)
