နိုင်ငံတကာအိုလံပစ်ကော်မတီ (IOC) ရဲ့ ပထမဆုံးအမျိုးသမီးဥက္ကဋ္ဌအဖြစ် ဇင်ဘာဘွေရေကူးအားကစားမယ် ဟောင်း ကာစတီ ကိုဗင်ထရီ ရွေးချယ်ခံခဲ့ရကြောင်း သိရပါတယ်။ မတ်လ ၂၀ ရက်က ဂရိနိုင်ငံမှာ ကျင်းပတဲ့ (၁၄၄) ကြိမ်မြောက် IOC အစည်းအဝေးမှာ ဥက္ကဋ္ဌရွေးကောက်ပွဲ အတွက် မဲပေးမှုပြုလုပ်ခဲ့ပြီး အသက် ၄၁ နှစ်ရှိပြီဖြစ်သူ ကိုဗင်ထရီ က ပြိုင်ဘက်ဖြစ်သူ အမျိုးသားကိုယ်စားလှယ် ခြောက်ဦးကိုကျော်ဖြတ်ကာ မဲအများဆုံးရရှိခဲ့တာ ဖြစ်ပါတယ်။ ပထမအဆင့် မဲပေးမှုမှာပင် ကိုဗင်ထရီ က ၄၉ မဲနဲ့ အများဆုံးရရှိပြီး ဥက္ကဋ္ဌဟောင်းဖြစ်သူ ဟွမ်အန်တိုနီယို ဆာမာရန့်ချ် က ၂၈ မဲနဲ့ ဒုတိယ၊ ကမ္ဘာ့ပြေးခုန်ပစ်အဖွဲ့ချုပ်ဥက္ကဋ္ဌ ဆီဘက်စတီယန်ကိုးက ရှစ်မဲဖြင့် တတိယ၊ ကျန်လေးဦးအနက် နှစ်ဦးက လေးမဲစီနှင့် နှစ်ဦးက နှစ်မဲစီသာ ရရှိခဲ့ပါတယ်။ ကိုဗင်ထရီ က IOC ရဲ့ (၁၀) ဦးမြောက် ဥက္ကဋ္ဌဖြစ်လာပြီး ပထမဆုံးအမျိုးသမီးဥက္ကဋ္ဌဖြစ်လာတဲ့အပြင် ပထမဆုံး အာဖရိက နိုင်ငံသားဥက္ကဋ္ဌအဖြစ်လည်း မှတ်တမ်းဝင်မှာ ဖြစ်ပါတယ်။ ကိုဗင်ထရီ က အိုလံပစ်ရွှေတံဆိပ် နှစ်ခု၊ ငွေတံဆိပ် လေးခုနှင့် ကြေးတံဆိပ် တစ်ခု ရရှိခဲ့ပြီး ကမ္ဘာ့စံချိန်တင်ခဲ့ဖူးသလို အာဖရိကအိုလံပစ် အားကစားသမားများ အနက် ဆုတံဆိပ် အများဆုံးအဖြစ် စံချိန်တင်ထားသူဖြစ်ပါတယ်။ ဒါ့အပြင် ကိုဗင်ထရီ က ဇင်ဘာဘွေနိုင်ငံ၏ လူငယ်၊ အားကစား၊ အနုပညာနှင့် ဖျော်ဖြေရေးဝန်ကြီးအဖြစ် ၂၀၁၈ ခုနှစ်ကတည်းက ဆောင်ရွက်လျက်ရှိပါတယ်။ ကိုဗင်ထရီ က IOC ဥက္ကဋ္ဌ တာဝန်များကို ယခုနှစ် ဇွန်လ ၂၃ ရက် မှစ၍ တာဝန်ယူထမ်းဆောင်မှာ ဖြစ်ပါတယ်။ (NVS 008)