ရန်ကုန်-မန္တလေးအမြန်လမ်းမကြီးရဲ့ ဘောနတ်ကြီးလမ်းဆုံရှိ (၃၉) မိုင် ယာဥ်ရပ်နားစခန်းမှာ EV ကားများ အတွက် လျှပ်စစ်ဓာတ်အားသွင်းရုံကို မတ်လ ၂၁ ရက်နံနက်ပိုင်းက စတင်ဖွင့်လှစ်ခဲ့တယ်လို့ သိရပါတယ်။ အဆိုပါ EV ကားများအတွက် လျှပ်စစ်ဓာတ်အားသွင်းရုံကို ပဲခူးတိုင်းဒေသကြီးဝန်ကြီးချုပ်ဦးမျိုးဆွေဝင်း၊ ဆောက်လုပ်ရေး ဝန်ကြီးဌာန ဒုတိယဝန်ကြီးဦးဝင်းဖေနှင့် တာဝန်ရှိသူများတက်ရောက် ဖွင့်လှစ်ပေးခဲ့ကြပြီး ဒုတိယ ဝန်ကြီး ဦးဝင်းဖေမှ နိုင်ငံအတွင်း လျှပ်စစ်ကားများကို ပိုမိုသုံးစွဲလာနိုင်သည်နှင့်အမျှ ရုပ်ကြွင်းလောင်စာ ဆီတင်သွင်းမှုအား လျော့ချသုံးစွဲ နိုင်ပြီး နိုင်ငံအတွက် ကြီးမားသည့်အကျိုးကျေးဇူးဖြစ်၍ လျှပ်စစ်ကားပြေးဆွဲမှုပိုမို တွင်ကျယ်အောင် ဝိုင်းဝန်းကြိုးစား ဆောင်ရွက်ကြစေလိုသည်ဟု ပြောကြားခဲ့ပါတယ်။ ထို့နောက် ပဲခူးတိုင်းဒေသကြီးဝန်ကြီးချုပ်၊ ဒုတိယဝန်ကြီးနှင့်တာဝန်ရှိသူများက EV ကားများအတွက် လျှပ်စစ် ဓာတ်အား ဖြည့်သွင်းရုံအတွင်း EV ကားများ လျှပ်စစ်ဓာတ်အားဖြည့်သွင်းနေမှုကိုကြည့်ရှုခဲ့ကြပါတယ်။ အဆိုပါ ဖွင့်လှစ်ခဲ့တဲ့ EV ကားများအတွက် လျှပ်စစ်ဓာတ်အားဖြည့်သွင်းရုံမှာ EV ကား ၁၀ စီးနှင့် EV ဘတ်စ်ကား ၆ စီး လျှပ်စစ်ဓာတ်အား ဖြည့်သွင်းနိုင်မည်ဖြစ်ကြောင်း သိရပါတယ်။ (NVS 004)