မြန်မာနိုင်ငံဆန်စပါးအသင်းချုပ်အနေနဲ့ ပို့ကုန်ကုမ္ပဏီများ၊ အသင်းဝင်ဆန်စက်ကြီးများနှင့် ညှိနှိုင်းပေါင်းစပ်ကာ စပါးတင်း သိန်း ၁၅၀ နှင့် ဧည့်မထဆန်အိတ် ၄ သိန်း ဝယ်ယူရေးကို ၂၀၂၅ ခုနှစ်၊ ဧပြီလနှင့် မေလမှာ ဆောင်ရွက် သွားမှာဖြစ်ကြောင်း မတ်လ ၂၂ ရက်က ကျင်းပပြုလုပ်ခဲ့တဲ့ မြန်မာနိုင်ငံဆန်စပါးအသင်းချုပ်၏ လုပ်ငန်းညှိနှိုင်း အစည်းအဝေးများ၊ ဆွေးနွေးပွဲများနှင့်စပ်လျဉ်း၍ မြန်မာနိုင်ငံဆန်စပါးအသင်းချုပ်က အသိပေးထုတ်ပြန်ထားပါတယ်။ လက်ရှိအခြေအနေမှာ နိုင်ငံတကာဝယ်လိုအား ကျဆင်းနေခြင်း၊ ပြည်တွင်းဝယ်လိုအားများ ကျဆင်းနေခြင်း အတွက် ဆန်စပါးဈေးကွက်အတွင်း ဧည့်မထနွေစပါးစိုက်ပျိုးသော တောင်သူလယ်သမားများအနေနဲ့ ဈေးနှုန်းကျ ဆင်းနေခြင်းနှင့် ရောင်းချရန်ခက်ခဲနေခြင်းတို့ကြောင့် စိုးရိမ်ပူပန်မှုများ ဖြစ်ပေါ်နေမှုနှင့်ပတ်သက်၍ ယခုကဲ့သို့ ဝယ်ယူပေးရန် ဆောင်ရွက်‌ပေးခြင်း ဖြစ်ပါတယ်။ ၂၀၂၅-၂၀၂၆ ဘဏ္ဍာနှစ်မှာ ပေါင်းဆန်တန်ချိန် ၃ သိန်းတင်ပို့နိုင်ရေး လျာထားဆောင်ရွက်လျက်ရှိသလို ပေါင်းဆန်စက် ၃၀ ကို အဆင့်မြှင့်တင်ခြင်း၊ လိုအပ်သော ပံ့ပိုးကူညီမှုများ ဆောင်ရွက်ခြင်း၊ ပေါင်းဆန်ထုတ်လုပ်မှု ဖွံ့ဖြိုးတိုးတက်ရေးအတွက် ရေတိုရေရှည်ဆောင်ရွက်ရန် ကိစ္စရပ်များနှင့်ပတ်သက်၍ ညှိနှိုင်းဆွေးနွေးမှုများ ပြုလုပ်ပြီး ဖြစ်ပါတယ်။ ထို့အတူ အသင်းချုပ်နှင့် MoU ရေးထိုးထားတဲ့ Solar Energy ကုမ္ပဏီ ၁၁ ခုနှင့် Export ဆောင်ရွက်လျက် ရှိတဲ့ ဆန်စက်ကြီးများမှာ Solar Energy စက်တပ်ဆင်အင်အား ၄၁ ဒသမ ၅ မဂ္ဂါဝပ်ကို စတင်ဆောင်ရွက်နိုင်ရန် ညှိနှိုင်းဆွေးနွေးခဲ့ကြပြီး၊ Solar Energy တပ်ဆင်မယ့် စနစ်အမျိုးမျိုးအပေါ် ညှိနှိုင်းဆွေးနွေးခြင်း၊ Solar ကုမ္ပဏီများ၏ ရင်းနှီးမြှုပ်နှံမှုနဲ့ ရရှိမယ့် လျှပ်စစ်ဓါတ်အားကို ဝယ်ယူသုံးစွဲရေး၊ လယ်ယာသီးနှံများတွင် စိုက်ပျိုးရေရရှိရေးဆောင်ရွက် မယ့် ကိစ္စများ စသည်တို့ကို ညှိနှိုင်းဆွေးနွေးခဲ့ကြောင်းသိရပါတယ်။ (NVS 004)