“မန္တလေးမြို့ရှိ မြနန်းစံကျော်ရွှေနန်းတော်နှင့် ရွှေနန်းတော်ကျောင်းသို့ ပြည်တွင်းပြည်ပခရီးသွား ၅၈,၀၀၀ ကျော် လာရောက်လည်ပတ်”
24 Mar
ယခု ၂၀၂၄-၂၀၂၅ ဘဏ္ဍာနှစ်အတွင်း မန္တလေးမြို့ရှိ မြနန်းစံကျော်ရွှေနန်းတော်နှင့် ရွှေနန်းတော်ကျောင်းသို့ လာရောက်လေ့လာတဲ့ ပြည်တွင်း/ပြည်ပ ခရီးသွားဧည့်သည်ပေါင်း ၅၈,၀၀၀ ကျော်ရှိတယ်လို့ ရှေးဟောင်းသုတေသန နှင့် အမျိုးသားပြတိုက် ဦးစီးဌာန၊ မန္တလေးဌာနခွဲမှ သိရပါတယ်။ အဆိုပါ မြနန်းစံကျော်ရွှေနန်းတော်နှင့် ရွှေနန်းတော်ကျောင်းဟာ နှစ်ပေါင်း ၁၆၅ နှစ်ရှိပြီဖြစ်ကာ ရှေးဟောင်း အဆောက်အအုံများနှင့် ရှေးဟောင်းမြန်မာ့လက်မှုအနုပညာ ဗိသုကာလက်ရာများတည်ရှိရာလည်း ဖြစ်တာကြောင့် လေ့လာလိုသူများနှင့် အပန်းဖြေအနားယူလိုသူများစွာက လာရောက်လေ့လာလည်ပတ်ကြခြင်း ဖြစ်ပါတယ်။ မြနန်းစံကျော်ရွှေနန်းတော်နှင့် ရွှေနန်းတော်ကျောင်းသို့ ခရီးသွားဧည့်သည် ဝင်ရောက်မှုစာရင်းများအရ ၂၀၂၄-၂၀၂၅ ဘဏ္ဍာနှစ်အတွင်း ပြည်ပ ခရီးသွားဧည့်သည်မှာ ၄,၉၉၃ ဦးနှင့် ပြည်တွင်းခရီးသွားဧည့်သည်ပေါင်း ၅၃,၂၁၁ ဦး၊ စုစုပေါင်း ၅၈,၂၀၄ ဦးရှိခဲ့ပါတယ်။ မြနန်းစံကျော်ရွှေနန်းတော်နှင့် ရွှေနန်းတော်ကျောင်းကြီးသို့ ပြည်တွင်းဧည့်သည်များအတွက် တစ်ဦးလျှင် ဝင်ကြေးကျပ် ၅၀၀ ကောက်ခံကြောင်းနှင့် ပြည်ပခရီးသွားများအတွက် တစ်ဦးကို ဝင်ကြေးငွေကျပ် ၁၅,၀၀၀ ကောက်ခံကြောင်း သိရပါတယ်။ (NVS 004)
