ကန့်ဘလူမြို့နယ်တွင် နေကြာသီးနှံများ ရာနှုန်းပြည့်ရိတ်သိမ်းပြီးစီးကာ တစ်ဧကလျှင် ၂၁ ဒသမ ၃၆ တင်း ထွက်ရှိ
23 Mar
စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် နေကြာဧကအားလုံး ရာနှုန်းပြည့်ရိတ်သိမ်း ပြီးစီးကာ တစ်ဧကလျှင် ၂၁ ဒသမ ၃၆ တင်းထွက်ရှိကြောင်း ကန့်ဘလူမြို့နယ် စိုက်ပျိုးရေးဦးစီးဌာနမှ သိရပါတယ်။ ကန့်ဘလူမြို့နယ်တွင် ဆောင်းသီးနှံစိုက်ပျိုးရာသီ၌ နေကြာ ၂,၉၃၅ ဧကထိ စိုက်ပျိုးနိုင်ခဲ့ရာ အဆိုပါ စိုက်ပျိုးထား သော နေကြာစိုက်ခင်းများကို ယခုနှစ် ဇန်နဝါရီလမှ စတင်ရိတ်သိမ်းခဲ့ရာ လက်ရှိတွင် ဧကအားလုံး ရာနှုန်းပြည့်ရိတ်သိမ်း ပြီးစီးခဲ့တာဖြစ်ပါတယ်။ ကန့်ဘလူမြို့နယ်အတွင်း နေကြာသီးနှံကို ယခုနှစ်မိုးရာသီထက် ဆောင်းရာသီမှာ အဓိကထားစိုက်ပျိုးခဲ့ပြီး နေကြာသီးနှံကို တိုးချဲ့စိုက်ပျိုးနိုင်ရေးအတွက် ပညာပေးသင်တန်းများနှင့် တောင်သူများ စွမ်းဆောင်ရည်မြင့်မားရေး အတွက် ပညာပေးသင်တန်းများကို မြို့နယ်စိုက်ပျိုးရေးဦးစီးဌာနက အရှိန်မြှင့်တင် ဆောင်ရွက်ပေးခဲ့တာဖြစ်ပါတယ်။ နေကြာကို အထွက်နှုန်းကောင်းမွန်အောင် စိုက်ပျိုးနိုင်မည်ဆိုပါက ပြည်တွင်းစားသုံးဆီဖူလုံစေမည့် အပြင် ပိုလျှံမှုကိုပါ ပြည်ပပို့ကုန်အဖြစ် တင်ပို့နိုင်မှာဖြစ်လို့ နေကြာကိုဒေသမရွေး ပိုမိုတိုးချဲ့စိုက်ပျိုးသင့်ကြောင်း ကန့်ဘလူ မြို့နယ် စိုက်ပျိုးရေးဦးစီးဌာနမှ သိရပါတယ်။ (NVS 004)
