ဗြိတိန်နိုင်ငံ၊ လန်ဒန်မြို့ရှိ လျှပ်စစ်ဓာတ်အားခွဲ စက်ရုံတစ်ခုအနီးတွင် မီးလောင်ကျွမ်းမှုဖြစ်ပွားပြီးနောက် လျှပ်စစ်ဓာတ်အားပြတ်တောက်မှုကြောင့် ပိတ်ပစ်ခဲ့ရသည့် ဟီးသရိုးလေဆိပ်အား မတ်လ ၂၂ ရက်တွင် အပြည့်အဝ ပြန်လည်ဖွင့်လှစ်နိုင်ခဲ့ပြီဖြစ်ကြောင်း လေဆိပ်အာဏာပိုင်အဖွဲ့က ထုတ်ပြန်သည်။ လျှပ်စစ်ဓာတ်အားပြတ်တောက်မှုကြောင့် ခရီးသည်များ ဘေးကင်းရေးအတွက် လေဆိပ်ကို အာဏာပိုင် အဖွဲ့က မတ်လ ၂၁ ရက် သန်းခေါင်ယံအထိ ပိတ်ထားခဲ့ရပြီး လေကြောင်းခရီးစဉ် ၁,၃၀၀ ကျော်မှာ နှောင့်နှေး သို့မဟုတ် ရပ်ဆိုင်းပစ်ခဲ့ရကြောင်းသိရသည်။ လျှပ်စစ်ဓာတ်အားပြတ်တောက်မှုသည် လေဆိပ်တစ်ခုလုံး၏ လည်ပတ်မှုအပေါ် ထိခိုက်ခဲ့ခြင်းကြောင့် အချို့လေကြောင်း ခရီးစဉ်များကိုမူ လေဆိပ်အာဏာပိုင်အဖွဲ့က မြို့အတွင်းရှိ အခြားလေဆိပ်တစ်ခုဖြစ်သည့် ဂက်ဝှစ်လေဆိပ်၊ ပြင်သစ်နိုင်ငံရှိ ပဲရစ်လေဆိပ်နှင့် အိုင်ယာလန်နိုင်ငံရှိ ရှန်နန်လေဆိပ်တို့သို့ ရွှေ့ပြောင်းပေးခဲ့ရသည်။ လေဆိပ်အာဏာပိုင်အဖွဲ့သည် မတ်လ ၂၂ ရက်တွင် လေဆိပ်အား အပြည့်အဝပြန်လည်ဖွင့်လှစ်နိုင်ရန် အတွက် အပိုဝန်ထမ်းရာပေါင်းများစွာအား အကူအညီတောင်းခံခဲ့ရပြီးနောက် ခရီးသည်ထောင်ပေါင်းများစွာအား လေဆိပ်မှတစ်ဆင့် ထွက်ခွာပျံသန်းနိုင်ရန်အတွက် ဆောင်ရွက်ပေးနိုင်ခဲ့ကြောင်း လေဆိပ်အာဏာပိုင်အဖွဲ့မှ အမှုဆောင်အရာရှိချုပ် သောမတ်ဝိုးဘိုင် က ပြောသည်။ လန်ဒန်မြို့ရှိ ဟီးသရိုးလေဆိပ်သည် ကမ္ဘာပေါ်တွင် ခရီးသည်အများဆုံး ဝင်ထွက်သွားလာနေသည့် လေဆိပ်တစ်ခုဖြစ်ပြီး ၂၀၂၄ ခုနှစ်တွင် ခရီးသည် ၈၃ ဒသမ ၉ သန်းခန့် အသုံးပြုခဲ့ကြောင်း သိရသည်။