ပေါ်တူဂီအသင်းရဲ့ ကစားပုံကို ဝေဖန်ခဲ့တဲ့ မာတီနက်ဇ်
22 Mar
ဒိန်းမတ်အသင်းကို ၁ ဂိုး၊ ဂိုးမရှိနဲ့ ရှုံးနိမ့်ခဲ့တဲ့ပွဲက ပေါ်တူဂီအသင်းကစားပုံဟာ သူ့လက်ထက်၂ နှစ်တာကာလ အတွင်း အဆိုးရွားဆုံးကစားပုံဖြစ်တယ်လို့ ပေါ်တူဂီအသင်းနည်းပြ မာတီနက်ဇ် က ပြောသွားခဲ့ပါတယ်။ ဒိန်းမတ်အသင်းနဲ့ပွဲမှာ ပေါ်တူဂီအသင်းတိုက်စစ်ကစားပုံက အားနည်းချက်တွေရှိခဲ့ပြီး ဂိုးပေါက်တည့်မှု ၂ ကြိမ် သာရှိခဲ့ပါတယ်။ အသင်းလိုက်ကစားပုံလည်း မကောင်းခဲ့သလို ကစားသမားတွေအကြား နားလည်မှုတွေ မကြာခဏ ဆိုသလို လွဲနေခဲ့တာကို တွေ့ခဲ့ရပါတယ်။ အဆိုပါပွဲစဉ်မှာ ပေါ်တူဂီဂိုးသမား ဒီယေဂို ကော်စတာ လက်စွမ်းပြနိုင်ခဲ့ လို့သာ ပေါ်တူဂီအသင်း ဂိုးနည်းနည်းနဲ့ ရှုံးနိမ့်ခဲ့ရတာဖြစ်ပါတယ်။၊ ဒိန်းမတ်အသင်းက ဂိုးပေါက်ခြိမ်းခြောက်မှု ၂၃ ကြိမ် အထိ လုပ်နိုင်ခဲ့ပေမယ့် ပေါ်တူဂီအသင်းကတော့ ဂိုးပေါက်ခြိမ်းခြောက်မှု ၈ ကြိမ်သာ ပြုလုပ်နိုင်ခဲ့တာဖြစ်ပါတယ်။ လိုချင်တဲ့ပုံစံအတိုင်း ကစားနိုင်ခြင်းမရှိခဲ့သလို ပေါ်တူဂီအသင်းကစားပုံက ၂ နှစ်အတွင်း အဆိုးရွားဆုံးပါပဲလို့ ပွဲအပြီးမှာ နည်းပြ မာတီနက်ဇ် က အသင်းအပေါ် ဝေဖန်သွားခဲ့တာဖြစ်ပါတယ်။ ပေါ်တူဂီကွင်းလယ်လူ ဖာနန်ဒက်စ် က ဒုတိယအကျော့မှာ ပိုကောင်းအောင်ကစားဖို့ လိုအပ်သလို လေ့ကျင့်ရေးကွင်းမှာ ပြင်ဆင်မှုတွေကို သေချာလုပ် သွားရမှာဖြစ်တယ်လို့ ပြောသွားခဲ့ပါတယ်။(NVS 008)
