ကမ္ဘာ့အဆင့်(၃) စပိန်တင်းနစ်ကြယ်ပွင့်ကစားသမား ကားလို့စ်အယ်လ်ကာရက်ဇ် က တင်းနစ်အဖွဲ့အစည်း များအပေါ် ပရော်ဖက်ရှင်နယ်တင်းနစ်သမားများအဖွဲ့ချုပ်(PTPA) ရဲ့ တရားစွဲဆိုမှုကို ထောက်ခံမှုမရှိကြောင်း ပြောဆိုခဲ့ပါတယ်။ ဝါရင့်ဆားဘီးယားတင်းနစ်သမား ဂျိုကိုဗစ် ပူးတွဲတည်ထောင်ထားတဲ့ PPTA က အမျိုးသားတင်းနစ်အဖွဲ့ချုပ် (ATP)၊ အမျိုးသမီးတင်းနစ်အဖွဲ့ချုပ်(WTA)၊ နိုင်ငံတကာတင်းနစ်အဖွဲ့ချုပ်(ITF)နှင့် နိုင်ငံတကာတင်းနစ်သမာဓိ အေဂျင်စီ(ITIA) စတဲ့ တင်းနစ်အဖွဲ့အစည်းများကို မတ်လ ၁၈ ရက်၌ အမေရိကန်နိုင်ငံ၊ နယူးယောက်မြို့ရှိ ခရိုင်တရားရုံးတွင် တရားစွဲဆိုခဲ့တာဖြစ်ပါတယ်။ PTPA က ကစားသမားများ၏ အကျိုးခံစားခွင့်ကို အလေးမထားမှု၊ ပွဲစဉ်ဇယား၊ အမှတ်ပေးစနစ်နှင့် ကစားသမားများ၏ ပုံရိပ်မူပိုင်ခွင့်များကို ထိန်းချုပ်မှုအတွက် စာမျက်နှာ ၁၆၃ မျက်နှာပါဝင်သည့် လျှောက်ထားစာဖြင့် တရားစွဲဆိုထားခြင်းဖြစ်ပါတယ်။ အဆိုပါတရားစွဲဆိုမှုတွင် အယ်လ်ကာရက်ဇ် ရဲ့ ပြောစကားကိုပါ ထည့်သွင်းထားတာကြောင့် ကားလို့စ် အယ်လ်ကာရက်ဇ် က ယခုလိုတုံ့ပြန်ပြောဆိုခဲ့ခြင်းဖြစ်ကြောင်း သိရပါတယ်။ (NVS 008)