NBA ချန်ပီယံဆုကို ၁၈ ကြိမ်ရရှိထားခဲ့ဖူးတဲ့ ဘော်စတွန် ဆဲလ်တစ်အသင်းကို စံချိန်တင် ဈေးဖြစ်တဲ့ ဒေါ်လာ ၆ ဒသမ ၁ ဘီလီယံနဲ့ ဝယ်ယူဖို့ အမေရိကန်စီးပွားရေးလုပ်ငန်းရှင် ဝီလျှံ ဦးဆောင်တဲ့ လုပ်ငန်းစုက သဘောတူညီမှု ရခဲ့တယ်လို သိရပါတယ်။ အဆိုပါ ပမာဏဟာ မြောက်အမေရိက အားကစားအသင်း ဝယ်ယူမှုထဲမှာ NFL အသင်း ဖြစ်တဲ့ ဝါရှင်တန် ကွန်မန်ဒါအသင်းကို ၂၀၂၃ ခုနှစ်က စံချိန်တင်ဝယ်ယူခဲ့တဲ့ ဒေါ်လာ ၆ ဘီလီယံနဲ့ ဈေးအကြီးဆုံးဝယ်ယူမှုလည်း ဖြစ်ခဲ့ပါတယ်။ ပြီးခဲ့တဲ့နှစ်က Forbes(ဖော့စ်)မဂ္ဂဇင်းရဲ့ ဖော်ပြချက်အရ ဆဲလ်တစ်အသင်းဟာ ဈေးကွက်တန်ကြေး ဒေါ်လာ ၆ ဘီလီယံနဲ့ စတုတ္ထမြောက်ဈေးအကြီးဆုံး NBA အသင်းအဖြစ်ရပ်တည်ခဲ့ပြီး ဂိုးဒင်းစတိတ်ဝါရီယာအသင်းက ဒေါ်လာ ၈ ဒသမ ၈ ဘီလီယံနဲ့ ဈေးအကြီးဆုံး အသင်းအဖြစ် ရပ်တည်နေခဲ့တာပါ။ ကာလီဖိုးနီးယားအခြေစိုက် နည်းပညာ ကုမ္ပဏီ တစ်ခုကို တည်ထောင်ထားတဲ့ ဝီလျှံ ဟာ ဆဲလ်တစ်အသင်းရဲ့ ထာဝရပရိသတ်တစ်ဦးဖြစ်သလို အသင်းကို ပိုင်ဆိုင်ခွင့် ရဖို့ကိုလည်း အမြဲတမ်းကြိုးစားနေခဲ့တာဖြစ်တယ်လို ပြောကြားထားပါတယ်။ လက်ရှိ ဆဲလ်တစ်အသင်း ပိုင်ရှင်တွေဟာ ၂၀၀၂ ခုနှစ်က အသင်းကို ဒေါ်လာသန်း ၃၆၀ နဲ့ ဝယ်ယူခဲ့တာဖြစ်ပါတယ်။ (NVS 008)