နေပြည်တော်ရှိ မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန-၁ (MICC-I)မှာ ပြန်ကြားရေး ဝန်ကြီးဌာနမှ ကြီးမှူးကာ မြန်မာ့ပုံရိပ်ဖော်ညွှန်းရေးအဖွဲ့ (Myanmar Narrative Think Tank) က စီစဉ်ကျင်းပသော “၂၀၂၅ အလွန်ဗဟု ဝင်ရိုးကမ္ဘာမှာ မြန်မာနိုင်ငံ ကြုံတွေ့လာရမည့် စိန်ခေါ်မှုများနှင့်အခွင့်အလမ်းများသုံးသပ်ဆွေးနွေးပွဲ”ကို မတ်လ ၂၁ ရက်မှာ ကျင်းပပြုလုပ်ခဲ့ပါတယ်။ အဆိုပါ ဆွေးနွေးပွဲအခမ်းအနားသို့ နစကဥက္ကဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်မှ တက်ရောက်အမှာစကားပြောကြားကာ၊ နိုင်ငံတော်စီမံအုပ်ချုပ်ရေးကောင်စီဝန်များ၊ ပြည်ထောင်စုဝန်ကြီးများ၊ ပြည်ထောင်စုအဆင့်ပုဂ္ဂိုလ်များ၊ အဆင့်မြင့်တပ်မတော်အရာရှိကြီးများ၊ ဒုတိယဝန်ကြီးများ၊ နိုင်ငံရေးပါတီများမှ ပုဂ္ဂိုလ်များ၊ တရုတ်၊ အိန္ဒိယ၊ အီတလီ၊ ဂျပန်၊ နီပေါ၊ ရုရှား၊ ထိုင်းနိုင်ငံတို့မှ ကျွမ်းကျင်ပညာရှင်များ၊ အစိုးရမဟုတ်သော အဖွဲ့အစည်းများနှင့် အရပ်ဘက်အဖွဲ့အစည်းများမှပုဂ္ဂိုလ်များ၊ ဌာနဆိုင်ရာအကြီးအကဲများ၊ နိုင်ငံတော်ကာကွယ်ရေး တက္ကသိုလ်(ရန်ကုန်၊ မန္တလေး)တို့ရှိ နိုင်ငံတကာဆက်ဆံရေးဌာနများမှ တာဝန်ခံဆရာ၊ ဆရာမများ၊ လေ့လာသူအဖြစ် တက်ရောက်ကြသူများအပါအဝင် စုစုပေါင်းလူဦးရေ ၂၃၀ ကျော် တက်ရောက်ခဲ့ပါတယ်။ ဆွေးနွေးပွဲမှာ “ပြောင်းလဲနေသော ဗဟုဝင်ရိုးကမ္ဘာတွင် မြန်မာနှင့်အာရှ၏ အခန်းကဏ္ဍ”၊ “၂၀၂၅ အလွန်ဗဟု ဝင်ရိုးကာလမှာ မြန်မာနိုင်ငံကြုံတွေ့ရမည့် ပထဝီစီးပွားရေး စိန်ခေါ်မှုများနှင့် ရရှိနိုင်သည့်အခွင့်အလမ်းများ”၊ “၂၀၂၅ အလွန်ဗဟုဝင်ရိုးကာလမှာ မြန်မာနိုင်ငံ ကြုံတွေ့ရမယ့် ပထဝီနိုင်ငံရေးစိန်ခေါ်မှုများနှင့်ရရှိနိုင်သည့် အခွင့်အလမ်းများ” စသည့် ခေါင်းစဉ်သုံးခုအား တရုတ်၊ ရုရှား၊ အိန္ဒိယ၊ ဂျပန်၊ ထိုင်း၊ အီတလီ၊ နီပေါနိုင်ငံတို့မှ ပထဝီစီးပွားရေးနှင့် ပထဝီ နိုင်ငံရေးဆိုင်ရာကျွမ်းကျင်ပညာရှင်များနှင့် ပြည်တွင်းမှပညာရှင်များမှ Panel Discussion အသီးသီးနဲ့ ပါဝင်ဆွေးနွေး ခဲ့ပါတယ်။ (NVS 004)