“ပြန်ကစားနိုင်မယ်လို့ မျှော်လင့်မထားခဲ့ဘူးလို့ဆိုတဲ့ ကာဂျီယော့စ်”
21 Mar
၃ နှစ်နီးပါးအကြာမှာ ပထမဆုံး အေတီပီတိုးနိုင်ပွဲ ပြန်ရခဲ့တဲ့ ဩစတြေးလျနိုင်ငံသား ကာဂျီယော့စ် က တင်းနစ် ပြန်ကစားနိုင်လိမ့်မယ်လို့တောင် မျှော်လင့်မထားခဲ့ဘူးလို့ ဝန်ခံသွားခဲ့ပါတယ်။ မိုင်ယာမီအိုးပင်းတင်းနစ် ပထမအဆင့်မှာ ပြိုင်ဘက် မက်ဒေါ်နယ် ကို အနိုင်ရရှိခဲ့ပြီးနောက်မှာ အသက် ၂၉ နှစ် အရွယ် ကာဂျီယော့စ် က ပြောကြားသွားခဲ့တာဖြစ်ပါတယ်။ အခုနှစ် အင်ဒီးယန်းဝဲလ်ပြိုင်ပွဲမှာ ပထမအဆင့်ကနေပဲ ထွက်ခဲ့ရတဲ့ ကာဂျီယော့စ် ဟာ ပြီးခဲ့တဲ့ ၂ နှစ်တာကာလအတွင်း ညာဘက်လက်ကောက်ဝတ်ဒဏ်ရာ ခွဲစိတ်ကုသခဲ့ရမှု နဲ့အတူ ရုန်းကန်နေခဲ့ရတာ ဖြစ်ပါတယ်။ ဒါ့အပြင် ဒူးနဲ့ ခြေဖဝါးဒဏ်ရာတွေကိုလည်း ရခဲ့ဖူးပါတယ်။ နှစ်အကြာကြီးနေမှရတဲ့ နိုင်ပွဲရဲ့ အရသာကို ဖော်ပြဖို့အတွက် စကားလုံးတောင်မရှိသလို အမှန်အတိုင်း ပြောရရင် တင်းနစ်ပြန်ကစားနိုင်ဖို့တောင် မျှော်လင့်မထားခဲ့ပါဘူးလို့ ကာဂျီယော့စ် က ပြောကြားသွားခဲ့ပါတယ်။ ကာဂျီယော့စ် ဟာ မိုင်ယာမီအိုးပင်း ဒုတိယအဆင့်မှာတော့ ဆီဒင်အဆင့် (၂၂) ရထားတဲ့ ရုရှားတင်းနစ်သမား ကာချာနော့ဗ် နဲ့ ဆက်လက်ယှဉ်ပြိုင်ရမှာ ဖြစ်ပါတယ်။ (NVS 008)
