အမေရိကန်ပညာရေးဝန်ကြီးဌာနကို ဖျက်သိမ်းမည့်အမိန့်ကြေညာချက်တစ်ရပ်အားသမ္မတ ဒေါ်နယ်ထရမ့် က မတ်လ ၂၀ ရက်တွင် လက်မှတ်ရေးထိုးရန် စီစဉ်ထားကြောင်း အမေရိကန်မီဒီယာများနှင့်အတွင်းသိများက ပြောကြားသည်။ အဆိုပါအမိန့်ကြေညာချက်တွင် လိုအပ်သော အစီအမံအားလုံး လုပ်ဆောင်ပြီးနောက် ဝန်ကြီး ဌာနကို ဖျက်သိမ်းရန်နှင့်ပညာရေးဆိုင်ရာစီမံခန့်ခွဲခွင့်အား ပြည်နယ်အသီးသီးသို့ ပြန်လည်အပ်နှင်းရန် ပညာရေး ဝန်ကြီး လင်ဒါမက်မဟွန် အား ထရမ့် က ညွှန်ကြားထားကြောင်း သတင်းဖော်ပြချက်အရ သိရသည်။ ပညာရေး ဝန်ကြီးဌာနကို ဖျက်သိမ်းမည့် ထရမ့်၏ အမိန့်ကြေညာချက်သည် နိုင်ငံအတွင်းရှိ ကျောင်းသား၊ ကျောင်းသူများ အတွက် ပညာရေးဆိုင်ရာရလဒ်များ ပိုမို တိုးတက်ကောင်းမွန်လာစေရန်အတွက်ကျောင်းသား၊ ကျောင်းသူများ၏ မိဘများ၊ ပြည်နယ်အာဏာပိုင်အဖွဲ့များနှင့် လူမှုအဖွဲ့ အစည်းများက ပညာရေးကဏ္ဍကို ထိန်းကျောင်း လုပ်ဆောင် နိုင်ရေးလုပ်ပိုင်ခွင့် ပိုမိုပေးအပ်ရန် ရည်ရွယ်ခြင်းဖြစ်သည်ဟု အိမ်ဖြူတော်မှ ပြောရေးဆိုခွင့်ရှိသူ ဟဲရစ် ဆင်ဖီးက ထုတ်ပြန်ချက်တွင် ပြောကြား သည်။ အမေရိကန်ပညာရေးဝန်ကြီးဌာနသည် မတ်လ ၁၁ ရက်ညပိုင်းတွင် ၎င်းဌာနရှိ ဝန်ထမ်းဦးရေ အများအပြား ကို လျှော့ချခဲ့ပြီး ဝန်ထမ်း ၄,၀၀၀ ဦးအနက် ၁,၃၀၀ ဝန်းကျင်အား လျှော့ချသွားမည်ဟု မျှော်မှန်းရကြောင်း အမေရိကန်မီဒီယာများက ဖော်ပြခဲ့ကြောင်း သိရသည်။ အမေရိကန်ပညာရေးဝန်ကြီးဌာနသည် လက်ရှိတွင် နိုင်ငံ အတွင်းရှိ စာသင်ကျောင်းများအတွက် ဒေါ်လာဘီလီယံပေါင်းများစွာ အသုံးပြုနေရပြီး ကျောင်းသား၊ ကျောင်းသူ များအား ပေးအပ်သည့် ပြည်ထောင်စုချေးငွေ ၁ ဒသမ ၆ ဘီလီယံကိုလည်း ကြီးကြပ်ကွပ်ကဲလျက်ရှိရာ အစိုးရ၏ အသုံးစရိတ်လျှော့ချရေး၏တစ်စိတ်တစ်ဒေသအဖြစ် ပညာရေးဝန်ကြီးဌာနကို ပိတ်သိမ်းရန် ဆုံးဖြတ်ခဲ့ခြင်း ဖြစ် ကြောင်း သိရသည်။ သို့ရာတွင် ထရမ့်အစိုးရ၏ အဆိုပါဆုံးဖြတ်ချက်ကို ပြည်သူအများအပြားက ကန့်ကွက် ထား သည်ဟု ဆင်ဟွာသတင်းဌာန၏ ဖော်ပြချက်အရ သိရသည်။