“အရှည်ပေ ၃၂၀ ရှိ ပဲခူးမြစ်ကူး သံကူကွန်ကရစ်တံတားဖွင့်လှစ်ခဲ့”
21 Mar
ပဲခူးတိုင်းဒေသကြီး၊ ဇိုင်းဂနိုင်းမြောက်ပိုင်းရပ်ကွက်နှင့် ပဲခူးမြို့မဈေးသို့ ဆက်သွယ်ထားတဲ့ ပဲခူးတိုင်းဒေသကြီး အစိုးရအဖွဲ့ရဲ့ ခွင့်ပြုရန်ပုံငွေကျပ်သန်း ၁,၅၀၀ ကျော်နဲ့ တည်ဆောက်ပေးခဲ့တဲ့ အရှည်ပေ ၃၂၀ ရှိ ပဲခူးမြစ်ကူး သံကူကွန်ကရစ်တံတားကို မတ်လ ၁၉ ရက်နံနက်ပိုင်းက ဖွင့်လှစ်ခဲ့ပါတယ်။ ပဲခူးမြစ်ကူးသံကူကွန်ကရစ်တံတားဟာ အရှည်ပေ ၃၂၀ ရှိပြီး ယာဉ်သွားလမ်း ၁၆ ပေ အကျယ်ရှိကာ ပဲခူးတိုင်းဒေသကြီးအစိုးရအဖွဲ့၏ ခွင့်ပြုရန်ပုံငွေကျပ်သန်း ၁,၇၂၁ ဒသမ ၃၅ သန်းနဲ့ တည်ဆောက်ပေးခဲ့ခြင်းဖြစ်ပါတယ်။ အဆိုပါ ပဲခူးမြစ်ကူးသံကူကွန်ကရစ်တံတားကို ပဲခူးတိုင်းဝန်ကြီးချုပ်ဦးမျိုးဆွေဝင်းတက်ရောက်ဖွင့်လှစ်ပေးခဲ့ပြီး ပဲခူးမြစ်ကူးသံကူ ကွန်ကရစ်တံတားရဲ့ မူလတံတားဟောင်းက တစ်လမ်းသွားနှစ်လွှာတစ်ထပ် ဘေလီတံတားဖြစ်ပြီး ဘေလီတံတားပေါ်မှ ယာဉ်ဖြတ်သန်းနေစဉ် အခြားယာဉ်များစောင့်ဆိုင်းနေရတာကြောင့် ယာဉ်ကြောကြပ်တည်းမှု ဖြစ်ပေါ်ခဲ့ရတယ်လို့ ပြောကြားခဲ့ပါတယ်။ ယခုအချိန်မှာ သံကူကွန်ကရစ်တံတားကို တည်ဆောက်ပြီးစီးခဲ့ပြီဖြစ်၍ နေ့စဉ်ဖြတ်သန်းသွားလာတဲ့ ဒေသခံများ၊ ဈေးသွားဈေးပြန်များ၊ ကျောင်းသား/ကျောင်းသူများ ယာဉ်အန္တရာယ်ကြုံတွေ့ရခြင်းမှကင်းဝေးပြီး ယာဉ်ကြောကြပ်တည်း မှု မရှိတော့ဘဲ မိုးတွင်းကာလပဲခူးမြစ်ရေမြင့်တက်လာမှု၊ ရေကြီးရေလျှံမှုကြောင့် ဖြတ်သန်းသွားလာတဲ့ ကားများနှင့် ခရီးသွားများ အန္တရာယ်ကင်းစွာသွား လာနိုင်စေမှာဖြစ်ကာ ဒေသခံများ၏သွားလာရေးမှာလည်း ပိုမိုလွယ်ကူလျှင်မြန်ပြီး ပဲခူးမြို့ကြီးရဲ့ မြို့ပြဖွံ့ဖြိုးတိုးတက်မှုနှင့်ကိုက်ညီကာ ပိုမိုဖွံ့ဖြိုးတိုးတက်လာမယ်လို့ ပြောကြားခဲ့ပါတယ်။ (NVS 004)
