“မန်းရွှေစက်တော် ဘေးမဲ့ဥယျာဉ်မှာ ရှားပါးစာရင်းဝင် ရွှေသမင်အကောင် ၆၀ ကျော် ထိန်းသိမ်းထား”
20 Mar
မြန်မာနိုင်ငံမှာ ဌာနေဖွားဒေသရင်းမျိုးစိတ် ရှားပါးစာရင်းဝင် မြန်မာ့ရွှေသမင်အကောင်ရေ ၆၀ ကျော်ကို မန်းရွှေစက်တော်ဘုရားကြီးရဲ့ ရွှေစက်တော် တောရိုင်းတိရစ္ဆာန်ဘေးမဲ့ဥယျာဉ်၌ ထိန်းသိမ်းစောင့်ရှောက်ထားကြောင်း မန်းရွှေစက်တော်ဘုရားကြီး၏ဂေါပကအဖွဲ့ထံမှ သိရပါတယ်။ ထိုရွှေသမင်များကို၂၀၁၂ ခုနှစ်မှာ နေပြည်တော် ဆာဖာရီဥယျာဉ်နှင့် ပုဂံလောကနန္ဒာဥယျာဉ်များမှ ရွှေသမင် အထီး ၅ ကောင်၊ အမ ၇ ကောင်နဲ့ မွေးမြူထိန်းသိမ်းခဲ့ခြင်းဖြစ်ပြီး ယခုအချိန်မှာ အထီး ၁၈ ကောင်၊ အမ ၃၅ ကောင်၊ စုစုပေါင်း ရွှေသမင် ၅၃ ကောင်ရှိခဲ့ရာမှ ထပ်မံကာ ရွှေသမင် ၉ ကောင်ပေါက်ဖွားလာခြင်းကြောင့် လက်ရှိမှာစုစုပေါင်း ၆၂ ကောင်ကို ဖြည့်စွက်စာများကျွေးမွေးကာ ထိန်းသိမ်းစောင့်ရှောက်လျက်ရှိပါတယ်။ ရွှေစက်တော်တောရိုင်း တိရစ္ဆာန်ဘေးမဲ့ဥယျာဉ်ဟာ မကွေးတိုင်းဒေသကြီး မင်းဘူးစကုမြို့နယ်မှာ တည်ရှိပြီး ဧရိယာစတုရန်းမိုင် ၂၁၃ ဒသမ ၄ ကျယ်ဝန်း၍ ပူပြင်းခြောက်သွေ့တဲ့ သန်း-ဒဟတ်တော များ၊ မုန်းချောင်းနှင့် မန်းချောင်းရေဝေကုန်းတန်းများကို ကာကွယ်ထိန်းသိမ်းစောင့်ရှောက်ရန် ၁၉၄၀ ခုနှစ်မှာ စတင် တည်ထောင်ခဲ့ကြပြီး ရွှေသမင်များရဲ့စားကျက်နေရာများအဖြစ် ပါဝင်ပါတယ်။ လက်ရှိမှာ မန်းရွှေစက်တော်ဘုရား ပွဲတော်ကျင်းပနေရာမှာ မင်းဘူး(စကု)မြို့နယ်မှ အထင်ကရနေရာများ လာရောက်လည်ပတ်တဲ့အခါ ရွှေစက်တော် ဘေးမဲ့ဥယျာဉ်မှ ဒေသရင်း မျိုးစိတ် မြန်မာ့ရွှေသမင်များကို လာရောက် လေ့လာကြည့်ရှုနိုင်တယ်လို့ ဖိတ်ခေါ်ထားပါတယ်။ (NVS 004)
