အီရန်နိုင်ငံက ထောက်ခံထားသည့် ယီမင်ရှိ ဟူသီသူပုန်အဖွဲ့သည် အမေရိကန်၏လေကြောင်းမှ တိုက်ခိုက် မှုများကို တုံ့ပြန်သည့်အနေဖြင့် ၂၄ နာရီအတွင်း အမေရိကန်လေယာဉ်တင် သင်္ဘောအုပ်ကို နှစ်ကြိမ် တိုက်ခိုက် ခဲ့သည်ဟု အဆိုပါသူပုန်အဖွဲ့က မတ်လ ၁၇ ရက်တွင်ထုတ်ပြန်ခဲ့ကြောင်း သိရသည်။ ဟူသီသူပုန်အဖွဲ့သည် ပင်လယ်နီအတွင်းရှိ USS Harry Truman လေယာဉ်တင်သင်္ဘောအပါအဝင် သင်္ဘောအုပ်ကို မောင်းသူမဲ့လေယာဉ် အပါအဝင် ဒုံးကျည် ၁၈ စင်းဖြင့် တိုက်ခိုက်ခဲ့ကြောင်း သူပုန် အဖွဲ့ကထုတ်ပြန်သည့် ကြေညာချက်ကို ၎င်းတို့၏ ဝက်ဆိုက်ပေါ်တွင် ဖော်ပြထားသည်။ အမေရိကန်လေယာဉ်တင်သင်္ဘောအုပ်ကို တိုက်ခိုက်ခြင်းသည် ယီမင်နိုင်ငံအတွင်း အမေရိကန်က ဆက်လက်လုပ်ဆောင်နေသည့် ရန်စမှုနှင့် တိုက်ခိုက်မှုများကို လက်တုံ့ပြန်ခြင်းဖြစ်ကြောင်း ဟူသီသူပုန်အဖွဲ့မှ ပြောရေးဆိုခွင့်ရှိသူတစ်ဦးက ပြောကြားထားကြောင်းသိရသည်။ အမေရိကန်အစိုးရအနေဖြင့် ဟူသီသူပုန်များက ပင်လယ်နီအတွင်းသွားလာနေသည့် အမေရိကန်သင်္ဘောများအပေါ် တိုက်ခိုက်နေခြင်းကို ရပ်တန့်နိုင်သည်အထိ အဆိုပါသူပုန်အဖွဲ့အား တိုက်ခိုက်ချေမှုန်းမည်ဟု သမ္မတဒေါ်နယ်ထရမ့်က ပြောကြားထားပြီး ထိုသို့လုပ်ဆောင် နိုင်ရန်အတွက်လည်း အင်အားကို အသုံးပြုသွားမည်ဖြစ်ကြောင်း ထုတ်ပြန်ထားသည်။ အီရန်က ကျောထောက် နောက်ခံပြုပေးထားသည့် ဟူသီသူပုန်အဖွဲ့သည် အစ္စရေး-ပါလက်စတိုင်းပဋိပက္ခတွင် ပါလက်စတိုင်း တို့အား ထောက်ခံထားပြီး ဂါဇာစစ်ပွဲတစ်လျှောက်လုံးတွင် အစ္စရေးနှင့်ပင်လယ်နီအတွင်း သွားလာနေသည့် သင်္ဘောများ အား တိုက်ခိုက်ခဲ့ကြောင်း သိရသည်။