အစ္စရေးဝန်ကြီးချုပ် ဘင်ဂျမင် နေတန်ယာဟု သည် လာမည့်ရက်သတ္တပတ်အတွင်း ဟန်ဂေရီနိုင်ငံသို့ တရားဝင်ခရီးစဉ် သွားရောက်မည်ဖြစ်ကြောင်း သတင်းများတွင်ဖော်ပြထားသည်။ အစ္စရေးဝန်ကြီးချုပ်သည် နိုင်ငံ တကာ ရာဇဝတ်တရားရုံး(အိုင်စီစီ)က ဂါဇာကမ်းမြောင်စစ်ပွဲကို အကြောင်းပြု၍ ဖမ်းဝရမ်းထုတ်ထားသည့်တိုင် ဟန်ဂေရီနိုင်ငံသို့သွားရောက်ရန် စီစဉ်ထားခြင်းဖြစ်သည်။ ဟန်ဂေရီဝန်ကြီးချုပ် ဗစ်တာအော်ဘင် သည် ဟန်ဂေရီသို့လာရောက်ရေးအတွက် အစ္စရေးဝန်ကြီးချုပ်ကို ပြီးခဲ့သည့်နှစ် နိုဝင်ဘာလကပင် တရားဝင်ဖိတ်ကြားထားပြီးဖြစ်သည်။ မိမိအနေဖြင့် အစ္စရေးဝန်ကြီးချုပ် နေတန်ယာဟု အပေါ် အိုင်စီစီကထုတ်ထားသည့်ဖမ်းဝရမ်းကို လိုက်နာဆောင်ရွက်လိမ့်မည်မဟုတ်ကြောင်း ဟန်ဂေရီဝန်ကြီးချုပ် ဗစ်တာအော်ဘင် က ပြောကြားထားပြီးဖြစ်သည်။ ဝန်ကြီးချုပ် နေတန်ယာဟု အနေဖြင့် ဟန်ဂေရီနိုင်ငံသို့ ဧပြီလ ၂၀ ရက်မတိုင်မီကာလအတွင်း ဟန်ဂေရီ နိုင်ငံသို့ သွားရောက်နိုင်ကြောင်း အစ္စရေးဝန်ကြီးချုပ်ရုံးမှ တာဝန်ရှိသူများက ပြောကြားသည်။ အိုင်စီစီတရားရုံး သည် ၂၀၂၄ ခုနှစ်၊ နိုဝင်ဘာလ ၂၁ ရက်က အစ္စရေးဝန်ကြီးချုပ် နေတန်ယာဟု အား ဖမ်းဝရမ်းထုတ်ခဲ့ခြင်း ဖြစ်ကြောင်းသိရသည်။