အမေရိကန်အစိုးရက ဂျပန်နိုင်ငံအပေါ် အခွန်တိုးမြှင့်ကောက်ခံမှုများ ထပ်မံချမှတ်ရန်ဆုံးဖြတ်မှုအပေါ် စိတ်မကောင်းဖြစ်ရကြောင်း ဂျပန်အစိုးရက မတ်လ ၁၂ ရက်တွင် ပြောကြားလိုက်ကြောင်းသိရသည်။ ဂျပန်နိုင်ငံမှတင်ပို့သည့် ကုန်ပစ္စည်းများအပေါ် အခွန်တိုးမြှင့်ကောက်ခံရန် ဆုံးဖြတ်ခဲ့ခြင်းသည် ဂျပန်-အမေရိကန် စီးပွားရေးဆက်ဆံမှုများ၊ ကမ္ဘာ့စီးပွားရေးနှင့် နိုင်ငံစုံကုန်သွယ်ရေးစနစ်အပေါ် သက်ရောက်လာ နိုင်ကြောင်း ဂျပန်အစိုးရအဖွဲ့မှ တာဝန်ရှိသူတစ်ဦးဖြစ်သူ ယိုရှီမာဆာ ဟာယာရှီ က သတင်းစာရှင်းလင်းပွဲ တစ်ခုတွင် ပြောကြားသည်။ ထို့ပြင် ဂျပန်နိုင်ငံမှ အမေရိကန်သို့တင်ပို့နေသည့် သံမဏိပို့ကုန်များသည် အမေရိကန်၏ အမျိုးသား လုံခြုံရေးကို ခြိမ်းခြောက်နေခြင်းမရှိဟု ၎င်းကဆက်လက်ပြောကြားသည်။ ဂျပန်အစိုးရ၏ ထုတ်ပြန်ချက်သည် ဂျပန်နိုင်ငံက အမေရိကန်သို့တင်ပို့နေသည့် အလူမီနီယံနှင့် သံမဏိထုတ်ကုန်များအပေါ် အခွန် ၂၅ ရာခိုင်နှုန်း တိုးမြှင့်ကောက်ခံရန် မတ်လ ၁၂ ရက်တွင် အမေရိကန်ကချမှတ်ပြီးနောက် ထွက်ပေါ်လာခြင်းဖြစ်သည်။ ဂျပန်စီးပွားရေး၊ ကုန်သွယ်ရေးနှင့် စက်မှုလုပ်ငန်းဝန်ကြီး ယိုဂျိုမှုတို သည် ယခုရက်သတ္တပတ် အစောပိုင်းက အမေရိကန်အစိုးရအဖွဲ့မှ အရာရှိများနှင့်တွေ့ဆုံ၍ အခွန်တိုးမြှင့်ကောက်ခံခြင်းမှ ဂျပန်နိုင်ငံအား ကင်းလွတ်ခွင့်ပြုရန် တောင်းဆိုခဲ့သော်လည်း အောင်မြင်မှုမရရှိခဲ့ကြောင်း ဒေသတွင်းမီဒီယာများက ထုတ်ပြန်ထား သည်။