ဗြိတိန်အစိုးရသည် အမေရိကန်သမ္မတ ဒေါ်နယ်ထရမ့် ၏ ယူကရိန်းငြိမ်းချမ်းရေး ကြိုးပမ်းမှုများကို လျော့ပါးစေရန် လုပ်ဆောင်လျက်ရှိသည်ဟု ရုရှားပြည်ပထောက်လှမ်းရေးအေဂျင်စီ(SVR)က ပြောကြားလိုက် ကြောင်းသိရသည်။ ဗြိတိန်အစိုးရအနေဖြင့် အမေရိကန်နှင့် ရုရှားတို့ကြားကျင်းပသည့် တွေ့ဆုံဆွေးနွေးမှုများကို ၎င်းတို့၏ ရုရှားထိန်းချုပ်ရေးမဟာဗျူဟာအတွက် ခြိမ်းခြောက်မှုအဖြစ် ရှုမြင်လျက်ရှိသည်ဟု SVR ၏ ပြန်ကြားရေးအဖွဲ့က မတ်လ ၁၁ ရက်တွင်ပြောကြားသည်။ ထို့ပြင် ထရမ့် က ရုရှားနိုင်ငံအား စူပါပါဝါနိုင်ငံကြီးတစ်နိုင်ငံအဖြစ် သဘောထား၍ ထိတွေ့ဆက်ဆံလျက် ရှိပြီး အမေရိကန်၏ အနီးကပ်ဆုံးသော မဟာမိတ်နိုင်ငံများအပေါ် အရေးမထားခြင်းကြောင့် ထရမ့် အပေါ် ဗြိတိန် အစိုးရအဖွဲ့မှ အရာရှိများက အားမလိုအားမရဖြစ်လျက်ရှိသည်ဟု SVR က ဆက်လက်ပြောကြားထားသည်။ ထို့ကြောင့် ဗြိတိန်အစိုးရသည် အမေရိကန်ကဦးဆောင်၍ လုပ်ဆောင်နေသည့် ယူကရိန်းငြိမ်းချမ်းရေး ဆောင်ရွက်မှုများပျက်ပြားစေရန် ကြိုးပမ်းနေခြင်းဖြစ်သည်ဟု SVR က ပြောကြားခြင်းဖြစ်သည်။ ထရမ့် သည် ဇန်နဝါရီလတွင် အမေရိကန်သမ္မတအဖြစ် တာဝန်ထမ်းဆောင်ချိန်မှစ၍ ရုရှားနှင့် ဆက်ဆံရေးကို ပြန်လည်ပြင်ဆင်ရန်ကြိုးပမ်းခဲ့ပြီး ဆော်ဒီအာရေဗျနိုင်ငံတွင် အမေရိကန်နှင့် ရုရှားနှစ်နိုင်ငံစလုံးမှ အဆင့်မြင့်အရာရှိကြီးများ၏ တွေ့ဆုံဆွေးနွေးပွဲကိုလည်း လွန်ခဲ့တဲ့လအတွင်းက ကျင်းပနိုင်ခဲ့တာကြောင့် ကမ္ဘာ့ အင်အားကြီးနှစ်နိုင်ငံကြား ဆက်ဆံရေးသည် ၂၀၂၂ ခုနှစ်မှစ၍ ပထမဆုံးအကြိမ်အဖြစ် သံတမန်နည်းလမ်းအရ ဆက်ဆံလာခြင်းဖြစ်ကြောင်း သိရသည်။