မကွေးတိုင်းဒေသကြီး၊ မင်းဘူး(စကု)မြို့နယ်ရှိ ရွှေစက်တော်ဘုရားပွဲတွင် မန်းချောင်းအပန်းဖြေဆင်စခန်းမှ ဆင်များစီးပြီး တောတောင်စိမ့်စမ်းနှင့်သဘာဝအလှတရားများကို ကြည့်ရှုခံစားနိုင်ကြောင်း မင်းဘူးမြို့သစ်ထုတ်ရေး ဌာနမှသိရပါတယ်။ ရွှေစက်တော်မန်းချောင်း အပန်းဖြေဆင်စခန်းသည် ရွှေစက်တော်ဘုရားအနီး မန်းချောင်းဘေး ဧက ၇၀၀ ရှိသော ပန်းတောင်း-ပျော်ဘွယ်ကြိုးပြင် ကာကွယ်တောတွင်တည်ရှိပြီး ကြည်လင်အေးမြသော စိမ့်စမ်းရေနှင့် စိမ်းစိုသာယာ လှပတဲ့ သဘာဝအလှတရားများနှင့် ရွှေစက်တော်ဘေးမဲ့တော ဥယျာဉ်မှ ရွှေသမင်၊ ကြယ်လိပ်နှင့် ငှက်မျိုးစိတ်များစွာကို လည်း ကြည့်ရှုလေ့လာနိုင်ပါတယ်။ ရွှေစက်တော်မန်းချောင်းအပန်းဖြေဆင်စခန်းကို မကွေးတိုင်းဒေသကြီး၊ မြန်မာ့သစ်လုပ်ငန်းမင်းဘူးခရိုင် သစ်ထုတ်ရေးဒေသက ၂ဝ၁၉ ခုနှစ်၊ ဖေဖော်ဝါရီလ ၉ ရက်က ဖွင့်လှစ်ခဲ့ပြီး ဆင်ထိန်းသိမ်းစောင့်ရှောက်ရေးကို မြန်မာ့ အခြေခံ၍ ခရီးသွားလုပ်ငန်းများ ဖွံ့ဖြိုးတိုးတက်စေရန်၊ ဆင်ဝန်ထမ်းများနှင့်ဒေသခံပြည်သူများ အလုပ်အကိုင် အခွင့် အလမ်းများရရှိစေရန်နှင့် ပြည်သူလူထုပူးပေါင်း ပါဝင်သော(Community Base Tourism) လုပ်ငန်းများ ထွန်းကားလာ စေရန်၊ ဆင်များ၏ အလေ့အထအမူအကျင့်နှင့် နေထိုင်မှုသဘာဝများကို သိရှိနားလည်ပြီး ဆင်များအပေါ် ချစ်ခင်မြတ်နိုး တတ်စေရန်၊ Eco-tourism ဖွင့်လှစ်ထားရှိခြင်းဖြင့် မြန်မာ့သဘာဝ တောတောင်ရေမြေ၏ အလှတရားများကို ခံစားတတ် စေပြီး ထိန်းသိမ်းစောင့်ရှောက်လိုစိတ်များ ပေါ်ပေါက်လာကာ သဘာဝပတ်ဝန်းကျင်ကာကွယ်ရေးကို အထောက်အကူ ဖြစ်စေရန်၊ အစိမ်းရောင်စီးပွားရေးလုပ်ငန်းဖြင့် နိုင်ငံတော်အတွက် ဝင်ငွေရရှိစေရန်စသော ရည်ရွယ်ချက်များဖြင့် ဆင်စခန်းကို ဖွင့်လှစ်ခဲ့ခြင်းဖြစ်ပါတယ်။ ရွှေစက်တော်မန်းချောင်း အပန်းဖြေဆင်စခန်းမှာ ရွှေစက်တော်ဘုရားမှ နှစ်မိုင်သာဝေးကွာတာကြောင့် စက်တော်ရာ ပါဒခြေတော်ရာနှစ်ဆူကို ဖူးပြီးပါက ဆင်စခန်းသို့လာကာ ဆင်များစီး၍ မန်းချောင်းတစ်လျှောက်ရှိလှပပြီး အေးချမ်းလှသည့် တောတောင်ရေမြေနှင့် သဘာဝအလှတရားများကို ကြည့်ရှုခံစားနိုင်ကြောင်း သိရပါတယ်။ (NVS-004)