ညစ်ညမ်းစာများကို ပုံနှိပ်ထုတ်ဝေခဲ့သည့် ဒေါ်သိမ့်ရတီနှင့် ဒေါ်နှင်းပိုပိုအောင် ဆိုသူ အမျိုးသမီး ၂ ဦးတို့ကို လုပ်ငန်းပိတ်သိမ်းပြီး အရေးယူထားကြောင်း ပြန်ကြားရေးဝန်ကြီးဌာန၏ ထုတ်ပြန်ချက်အရသိရပါတယ်။ အဆိုပါ ပုံနှိပ်/ထုတ်ဝေသူများသည် ညစ်ညမ်းစာပေများဖြစ်သော ဖူးငုံခင် ရေးသားသည့် “ချစ်လွန်လွန်း၍ ထုဆစ်ခဲ့သည်" စာအုပ်၊ V Vkit ရေးသားသည့် “ဗိုလ်ကြီးရဲ့ နှင်းဆီ"၊ တယော် ရေးသားသည့် “အချစ်ထက် သာလွန်သော” စာအုပ်နှင့် YELLOWI SH-ONE ရေးသားသည့် "ကျွန်မရဲ့ မိထွေးက ကျွန်မခင်ပွန်းဖြစ်သွားပြီ" စာအုပ်တို့ကို ပုံနှိပ်ထုတ်ဝေ ဖော်ပြခဲ့ပါတယ်။ ပုံနှိပ်ခြင်းနှင့်ထုတ်ဝေခြင်းလုပ်ငန်းဥပဒေပုဒ်မ ၈၊ ပုဒ်မခွဲ(ဂ)ပါ ညစ်ညမ်းစာများကိုဖော်ပြခြင်း စည်းကမ်းချက်ကို ဖောက်ဖျက်၍ ဟီရိဩတ္တပ္ပကင်းသော၊ မြန်မာ့လူ့အဖွဲ့အစည်းကလက်မခံသော၊ လူငယ်များ၏ တွေးခေါ်မြော်မြင်မှုနှင့် ခံစားနားလည်မှုကို လွဲမှားစေနိုင်သော အကြောင်းအရာများကို ပုံနှိပ်၊ ထုတ်ဝေဖြန့်ချိခဲ့သော ပုံနှိပ်ထုတ်ဝေသူများကို ၂၀၂၅ ခုနှစ်၊ မတ်လအတွင်း လုပ်ငန်းအသိအမှတ်ပြုလက်မှတ်များကို ရုပ်သိမ်းခြင်း၊ ထုတ်ဝေစာအုပ်များကို တရားမဝင် ထုတ်ဝေစာအဖြစ် ထုတ်ပြန်ကြေညာခြင်း၊ ဥပဒေနှင့်အညီတရားစွဲဆိုခြင်းများကို ဆောင်ရွက်လျက်ရှိကြောင်း ထုတ်ပြန် ထားပါတယ်။ ပုံနှိပ်သူနှင့်ထုတ်ဝေသူများအနေနဲ့ ပုံနှိပ်ခြင်းနှင့်ထုတ်ဝေခြင်းလုပ်ငန်းဥပဒေကို လေးစားလိုက်နာကြရန်နှင့် ဥပဒေပါ စည်းကမ်းချက်များကိုဖောက်ဖျက်၍ ပုံနှိပ်ထုတ်ဝေခြင်းများကိုပြုလုပ်ပါက ဥပဒေနှင့်အညီ တရားစွဲဆို ဆောင်ရွက်သွားမည်ဖြစ်ကြောင်းလည်း ပြန်ကြားရေးဝန်ကြီးဌာနက အသိပေးကြေညာထားပါတယ်။ (NVS-004)