အမေရိကန်ပြည်ထောင်စုအပေါ် ဆက်လက်အမှီသဟဲပြုမည့်အစား ကိုယ်ပိုင်ကာကွယ်ရေး ယူနီယံ တစ်ရပ်ထူထောင်နိုင်ရေးအတွက် ကြိုးပမ်းသင့်သည်ဟု ဥရောပကော်မရှင်အကြီးအကဲ အူဆူလာ ဗွန်ဒါလေယန်က ပြောကြားလိုက်ကြောင်း သိရသည်။ အီးယူအဖွဲ့သည် လက်ရှိတွင် ခက်ခဲသည့် ပထဝီနိုင်ငံရေးပြိုင်ဆိုင်မှုများ ဖြစ်ပေါ်နေသည့်ကာလအတွင်းသို့ ဝင်ရောက်လာပြီဖြစ်ပြီး အကာအကွယ်ပေးမည်ဟူသော ကတိကဝတ်များသည် ယခုအခါ သံသယဖြစ်စရာအခြေအနေသို့ ရောက်ရှိလာပြီဖြစ်ကြောင်း ဗွန်ဒါလေယန် က ဘရပ်ဆဲမြို့၌ မတ်လ ၉ ရက်တွင်ကျင်းပသည့် သတင်းစာရှင်းလင်းပွဲတစ်ခု၌ ပြောကြားသည်။ ထို့ကြောင့် အီးယူအဖွဲ့အနေဖြင့် မိမိတို့၏ ကိုယ်ပိုင်ကာကွယ်ရေးယူနီယံတစ်ရပ် ထူထောင်နိုင်ရေး အခြေခံ အုတ်မြစ်အဖြစ် ယူရို ၈၀၀ ဘီလီယံ (ဒေါ်လာ ၈၆၈ ဘီလီယံ) မတည်မည့်အစီအစဉ်ကို ၎င်းကထုတ်ဖော် ပြောကြား ခဲ့ကြောင်းသိရသည်။ ထို့ပြင် ဗြိတိန်၊ နော်ဝေနှင့် ကနေဒါကဲ့သို့သော စိတ်တူသဘောတူနိုင်ငံများနှင့်လည်း အီးယူ အဖွဲ့က ပူးပေါင်းဆောင်ရွက်သွားမည်ဖြစ်ကြောင်း သိရသည်။ ဥရောပကော်မရှင်အဖွဲ့သည် အီးယူအပေါ် ကျရောက်လာနိုင်သည့် ခြိမ်းခြောက်မှုဆိုင်ရာ စိတ်မှန်းအခြေအနေများကို ခွဲခြမ်းစိတ်ဖြာထားသည့် စာတမ်း တစ်စောင်ကို မကြာမီထုတ်ပြန်သွားမည်ဖြစ်ပြီး ယင်းခြိမ်းခြောက်မှုများကို ရင်ဆိုင်ဖြေရှင်းနိုင်မည့် နည်းလမ်းများ ကိုလည်း အဆိုပြုသွားရန် စီစဉ်ထားကြောင်း RT သတင်းဌာနဖော်ပြချက်အရ သိရသည်။