“သူလျှိုလုပ်ဆောင်မှုများတွင်ပါဝင်သည့် ဗြိတိန်သံအမှုထမ်းနှစ်ဦးကို နိုင်ငံအတွင်းမှထွက်ခွာရန် ရုရှား အမိန့် ပေး”
11 Mar
သူလျှိုလုပ်ဆောင်မှုများတွင်ပါဝင်ခဲ့သည့် ဗြိတိန်သံရုံးမှ အမှုထမ်းနှစ်ဦးကို နှစ်ပတ်အတွင်း နိုင်ငံအတွင်းမှ ထွက်ခွာသွားရန် ရုရှားအစိုးရက မတ်လ ၁၀ ရက်တွင် အမိန့်ပေးလိုက်ကြောင်းသိရသည်။ အဆိုပါ ဗြိတိန် သံအမှုထမ်းများသည် ထောက်လှမ်းရေးအချက်အလက်စုဆောင်းခြင်းနှင့် ရုရှားနိုင်ငံ၏လုံခြုံရေးကို လျော့ပါး စေမည့် ဆောင်ရွက်မှုများကို လုပ်ဆောင်ခဲ့ကြောင်း ပြည်ထောင်စုလုံခြုံရေးအဖွဲ့က ဖော်ထုတ်တွေ့ရှိပြီး နောက်ပိုင်း ၎င်းတို့၏သံအမှုထမ်းအဖြစ် တရားဝင်အသိအမှတ်ပြုမှုကို ရုရှားအစိုးရကရုပ်သိမ်းပြီး နိုင်ငံအတွင်းမှ ထွက်ခွာသွား ရန် ညွှန်ကြားလိုက်ခြင်း ဖြစ်သည်။ အဆိုပါသံအမှုထမ်းများသည် ဗြိတိန်သံရုံးရှိ နိုင်ငံရေးဌာနမှဖြစ်ပြီး ၎င်းတို့သည် ရုရှားနိုင်ငံအတွင်းသို့ ဝင်ရောက်ခွင့်ရရှိပြီးနောက်ပိုင်းတွင် သတင်းအမှားများကို ရည်ရွယ်ချက်ရှိရှိပေးပို့ခဲ့ပြီး ရုရှားနိုင်ငံ၏ဥပဒေကို ချိုးဖောက်ခဲ့ကြကြောင်း ပြည်ထောင်စုလုံခြုံရေးအဖွဲ့က ထုတ်ပြန်သည့်ကြေညာချက်တွင် ဖော်ပြထားကြောင်းသိရ သည်။ ထို့ကြောင့် ရုရှားနိုင်ငံခြားရေးဝန်ကြီးဌာနသည် အခြားအေဂျင်စီများနှင့် ပူးပေါင်းဆောင်ရွက်ပြီး အဆိုပါ ဗြိတိန်သံအမှုထမ်းများ၏သံအမှုထမ်းအဖြစ် တရားဝင်အသိအမှတ်ပြုမှုကို ရုပ်သိမ်း၍ နိုင်ငံအတွင်းမှထွက်ခွာရန် အမိန့်ပေးခဲ့ခြင်းဖြစ်သည်။ ပြည်ထောင်စုလုံခြုံရေးအဖွဲ့အနေဖြင့် ပြည်ပထောက်လှမ်းရေးအဖွဲ့များ၏ ထောက်လှမ်းရေး သတင်းအချက်အလက်စုဆောင်းခြင်းနှင့် နိုင်ငံ၏လုံခြုံရေးကိုလျော့ပါးစေမည့် လုပ်ဆောင်ချက် များကို တန်ပြန်နိုင်ရန်အတွက် ရယူအသုံးပြုနိုင်သည့် နည်းလမ်းအားလုံးကို အသုံးပြု၍ လုပ်ဆောင်သွားမည် ဖြစ် ကြောင်း ၎င်းအဖွဲ့က ထုတ်ပြန်သည့် ကြေညာချက်တွင် ဖော်ပြထားကြောင်း RT သတင်းဌာန၏ဖော်ပြချက်အရ သိရသည်။
