“မြန်မာ့ရိုးရာပန်းပဲလုပ်ငန်းများကို လက်ဆင့်ကမ်းသင်ယူလုပ်ကိုင်သူနည်းပါးလာ”
11 Mar
ပြည်ပမှကုန်ပစ္စည်းများ ဈေးနှုန်းသက်သာစွာဝင်ရောက်လာခြင်း၊ ပညာသင်ယူရတဲ့ အချိန်ကြာမြင့်ခြင်း၊ မီးအပူ၊ သံအပူတို့ကို ခံစားရခြင်း၊ လိုရာပုံရရှိအောင် ထုရိုက်ရတဲ့အတွက် ပင်ပန်းခြင်းတို့ကြောင့် မြန်မာ့ပန်းပဲပညာကို လက်ဆင့်ကမ်းသင်ယူသူနည်းပါးလာတယ်လို့ သိရပါတယ်။ အခုလိုသင်ယူသူများနည်းပါးလာတဲ့မှုကို အဖြေရှာကြရန်နှင့် ပြည်တွင်းသံထည်ထုတ်ကုန်ပစ္စည်းများ ထုတ်လုပ်တဲ့ MSME လုပ်ငန်းများကို မိရိုးဖလာမှ ခေတ်နဲ့အညီ ပိုမိုအဆင့်မြှင့်တင် ထုတ်လုပ်နိုင်ရေး ဆောင်ရွက် သွားဖို့လိုကြောင်းလည်း စက်မှုဝန်ကြီးဌာန၊ ပြည်ထောင်စုဝန်ကြီး ဒေါက်တာချာလီသန်း က တိုက်တွန်းထားပါတယ်။ ပန်းပဲလုပ်ငန်းများဟာ ပြည်တွင်းဈေးကွက်သာရှိနေပြီး ကုန်ကြမ်းလုံလောက်မှု၊ ထုတ်ကုန်ပစ္စည်း အရည်အသွေး၊ တီထွင်ဆန်းသစ်မှု၊ နည်းပညာနှင့် ဈေးကွက်ရှာဖွေနိုင်မှုစတဲ့ လိုအပ်ချက်များရှိနေတဲ့အတွက် လိုအပ်ချက်များကို ဖြည့်ဆည်းဆောင်ရွက်ပေးနိုင်ပါက ပြည်တွင်းထုတ်လုပ်ရောင်းချမှု အားကောင်းလာကာ ပြည်ပတင်ပို့ရောင်းချနိုင် သည်အထိ အောင်မြင်လာမှာဖြစ်တယ်လို့ ဆိုပါတယ်။ မြန်မာနိုင်ငံမှာ မိရိုးဖလာပန်းပဲလုပ်ငန်းများ၊ အိမ်တွင်းမှုလုပ်ငန်းများမှ မီးဖိုချောင်သုံးဓား၊ ကတ်ကြေးမှ အစပြုပြီး လယ်ယာသုံးပစ္စည်းများ၊ လက်သမားသုံးပစ္စည်းများကို အာမခံနဲ့ ထုတ်လုပ်ရောင်းချလျက်ရှိနေပါတယ်။ အိမ်တွင်းမှုလုပ်ငန်းများမှ မီးဖိုချောင်သုံးဓား၊ ကတ်ကြေးမှအစပြုပြီး လယ်ယာသုံးပစ္စည်းများ၊ လက်သမားသုံးပစ္စည်း များအားလုံးကို အရည်အသွေးမြှင့် နိုင်ငံတကာအဆင့်မီထုတ်လုပ်ရေး၊ ဈေးကွက်တိုးတက် ရရှိရေးတို့ကို အစိုးရ - ပုဂ္ဂလိကပူးပေါင်းကြိုးစားမှုနဲ့ ရလဒ်ကောင်းများရရှိအောင် ကြိုးစားဆောင်ရွက်သွားကြရန် နိုင်ငံတော်မှ လမ်းညွှန် ထားရှိပါတယ်။(NVS 004)
