မြန်မာနိုင်ငံရုပ်ရှင်အစည်းအရုံး (၇၉) နှစ်မြောက်နှစ်ပတ်လည်နေ့၊ ရုပ်ရှင်ဖခင်ကြီးများကြေးရုပ်နှင့် ရာပြည့် ရင်ပြင်ဖွင့်လှစ်ခြင်းအခမ်းအနားကို မတ်လ ၈ ရက် နံနက်ပိုင်းတွင် ရန်ကုန်မြို့၊ ဗဟန်းမြို့နယ်ရှိ မြန်မာနိုင်ငံ ရုပ်ရှင် အစည်းအရုံး(ဗဟို)၌ ကျင်းပခဲ့ကြောင်း သိရပါတယ်။ အခမ်းအနားတွင် မြန်မာနိုင်ငံရုပ်ရှင်အစည်းအရုံး ဥက္ကဋ္ဌ အကယ်ဒမီ ဦးကြည်စိုးထွန်း က အဖွင့်အမှာစကား ပြောကြားခဲ့ပြီး အခမ်းအနားသို့ ရန်ကုန်တိုင်းဒေသကြီးအစိုးရအဖွဲ့ တိုင်းရင်းသားရေးရာဝန်ကြီး ဦးစောဂျက်ကော့ထူး၊ တာဝန်ရှိသူများနှင့် ဖိတ်ကြားထားသူများ တက်ရောက်ခဲ့ကြပါတယ်။ မြန်မာနိုင်ငံရုပ်ရှင်အစည်းအရုံး (၇၉) နှစ်မြောက်နှစ်ပတ်လည်နေ့တွင် ရုပ်ရှင်ပညာသင်တန်းဆင်းများ တွေ့ဆုံ စကားဝိုင်း၊ ဗီဒီယိုခေတ်သရုပ်ဆောင်များ တွေ့ဆုံစကားဝိုင်း၊ ခေတ်အဆက်ဆက်ရွှေကြိုမောင်မယ်များ စကားဝိုင်း တို့ကိုကျင်းပကာ ခေတ်ဟောင်းဂန္ထဝင်ရုပ်ရှင် “ငဘ” ဇာတ်ကားကို ပြသခြင်းများအပြင် ညနေပိုင်း၌ နွမ်းပါးအနုပညာ ရှင်များကို ဗလာမပါကံစမ်းမဲများဖောက်ပေးခြင်း၊ နိဗ္ဗာန်ဈေးဖြင့် ဧည့်ခံကျွေးမွေးခြင်း၊ ဂိမ်းကစားခြင်း၊ မှတ်တမ်း ဓာတ်ပုံရိုက်ကူးခြင်းနှင့် မြန်မာ့ရုပ်ရှင်သမိုင်းပြတိုက်ကြည့်ရှုခြင်း အစီအစဉ်များဖြင့် ကျင်းပခဲ့ကြောင်း သိရပါတယ်။ (NVS 004)