ပွင့်လင်းရာသီတွင် ပုသိမ်ထီးဈေးကွက် အရောင်းအဝယ်ကောင်းမွန်နေပြီး ပြည်တွင်း၌သာမက ပြည်ပ ဈေးကွက်တွင်ပါ လူကြိုက်များနေ၍ အမှာစာများရရှိနေကြောင်း ပုသိမ်ထီးလုပ်ငန်းလုပ်ကိုင်သူများထံမှ သိရပါတယ်။ မြန်မာ့ရိုးရာလက်မှုအနုပညာများထဲမှ တစ်ခုအပါအဝင်ဖြစ်တဲ့ ပုသိမ်ထီးလုပ်ငန်းက မြန်မာနိုင်ငံအတွင်း တွင်သာမကဘဲ ပြည်ပနိုင်ငံများမှာပါ နာမည်ကျော်ကြားသည့်လုပ်ငန်းဖြစ်ပါတယ်။ ပုသိမ်ထီးကို အလှဆောင်းဆိုဒ် များအပြင် ဟိုတယ်အလှဆင်ရန်နှင့် ကမ်းခြေသုံးထီး ၂ ပေ၊ ၃ ပေနှင့် ၄ ပေ ဆိုဒ်ထီးများကိုပါ ဝယ်ယူမှုများရှိနေပြီး ရန်ကုန်မြို့မှတစ်ဆင့် ပြည်ပနိုင်ငံများသို့တင်ပို့ရန် လာရောက် ချိတ်ဆက်မှု များလည်းရှိကြောင်း သိရပါတယ်။ ပွင့်လင်းရာသီရောက်ရှိချိန်တွင် ပုသိမ်ထီးဈေးကွက်မှာ တန်ဆောင်တိုင်၊ ကထိန်အလှူရာသီများတွင် အလှဆောင်းထီးအဖြစ် အသုံးပြုလျက်ရှိနေတာဖြစ်ပါတယ်။ နေပြည်တော်၊ ရန်ကုန်၊ မန္တလေး၊ စစ်ကိုင်း၊ မြဝတီနှင့် အခြားမြို့များတွင်ပါ ပုသိမ်ထီးများကို တင်ပို့ရောင်းချလျက်ရှိနေပါတယ်။ နိုင်ငံခြားငွေဖြင့် ဝယ်ယူရသော ကုန်ကြမ်းပစ္စည်းများမပါဘဲ ဒေသထွက်ကုန်ကြမ်းများဖြစ်သော မအူသစ်၊ ထီးရိုးဝါး၊ သရကူဝါး၊ မြန်မာပိတ်စများ၊ ဒေသတွင်းမှထွက်ရှိတဲ့ သုတ်ဆေး၊ ဆိုးဆေးများကို အသုံးပြုကာ ထီးရွက် ပေါ်တွင် ကနုတ်ပန်းချီရေးဆွဲခြင်း၊ ရှုခင်းပုံများရေးဆွဲခြင်း၊ ရှေးခေတ်ပန်းချီလက်ရာများ ရေးဆွဲခြင်း၊ ဆေးဆိုးခြင်းများ ပြုလုပ်၍ ထီးရွက်ကိုအလှဆင်ထားတာဖြစ်လို့ ပုသိမ်ထီးလုပ်ငန်းက မြန်မာ့လက်မှုအနုပညာကို ဖော်ထုတ်နိုင်သည့် ရိုးရာလုပ်ငန်းတစ်ခုအဖြစ် ထင်ရှားကျော်ကြားလျက်ရှိပါတယ်။(NVS 004)