ပြည်ပနိုင်ငံများ၌ဖွင့်ထားသည့် ကောင်စစ်ဝန်ရုံးများအနက် တစ်ဒါဇင်ခန့်ကို လာမည့်လများအတွင်း ပိတ်သိမ်းရန် အမေရိကန်နိုင်ငံခြားရေးဝန်ကြီးဌာနက ပြင်ဆင်နေကြောင်း မတ် ၆ ရက်သတင်းများတွင် ဖော်ပြထားသည်။ အမေရိကန် နိုင်ငံခြားရေးဝန်ကြီးဌာနက ပိတ်သိမ်းမည့် ကောင်စစ်ဝန်ရုံးများအနက် အများစုမှာ အနောက်ဥရောပနိုင်ငံများ၌ ဖွင့်ထားသော ကောင်စစ်ဝန်ရုံးများဖြစ်ကြောင်း အမေရိကန်တာဝန်ရှိသူများက ပြောကြားထားသည်။ ထို့ပြင် အမေရိကန်နိုင်ငံခြားရေးဝန်ကြီးဌာနအနေဖြင့် ကမ္ဘာတစ်ဝန်းရှိ လုပ်သားအင်အားကို လျှော့ချ ရန်လည်း စဉ်းစားနေကြောင်း သိရသည်။ သမ္မတ ဒေါ်နယ်ထရမ့်ဦးဆောင်သော အမေရိကန်အစိုးရအဖွဲ့သစ်သည် အမေရိကန်နိုင်ငံသား သံတမန် ဝန်ထမ်းအင်အားနှင့် ဌာနေနိုင်ငံသားဝန်ထမ်းအင်အား နှစ်မျိုးစလုံးကိုလျှော့ချရန် ကမ္ဘာတစ်ဝန်းရှိ အမေရိကန် သံရုံးများကို ညွှန်ကြားထားပြီးဖြစ်သည်။ သမ္မတ ဒေါ်နယ်ထရမ့် နှင့် တက်စလာကုမ္ပဏီအကြီးအကဲ အီလွန်မက်စ် တို့သည် အမေရိကန်အစိုးရ ဖက်ဒရယ်ဌာနများ၏ အသုံးစရိတ်များကို လျှော့ချရေးအတွက် ကြိုးပမ်းလျက်ရှိသည်။ အမေရိကန်နိုင်ငံခြားရေးဝန်ကြီးဌာနက ပိတ်သိမ်းမည့် ပြည်ပကောင်စစ်ဝန်ရုံးများထဲတွင် ဘရာဇီးနိုင်ငံနှင့် ပေါ်တူဂီနိုင်ငံတို့မှ ကောင်စစ်ဝန်ရုံးများလည်း ပါဝင်ကြောင်း သိရသည်။