ထားဝယ်ရေနက်ဆိပ်ကမ်းအနီး LNG Terminal တည်ဆောက်၍ ပြည်တွင်းသုံးနှင့် ပြည်ပသို့တင်ပို့ ရောင်းချ နိုင်ရေး ရင်းနှီးမြှုပ်နှံဆောင်ရွက်ရန်အတွက် စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင်နှင့် ရုရှားနိုင်ငံမှ တာဝန်ရှိသူများ မော်စကိုမြို့ရှိ Radisson Collection ဟိုတယ်၌ မတ်လ ၅ ရက်၊ နံနက်ပိုင်းက တွေ့ဆုံဆွေးနွေး ခဲ့ကြသည်ဟု သိရပါတယ်။ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်ရဲ့ ရုရှားနိုင်ငံခရီးစဉ်အတွင်း ပြုလုပ်တဲ့ အဆိုပါဆွေးနွေးပွဲမှာ ရုရှားဖက်ဒရေးရှင်းနိုင်ငံ စွမ်းအင်ဝန်ကြီးဌာန ပထမဒုတိယဝန်ကြီး Mr. Pavel Sorokin နှင့် ရုရှားနိုင်ငံတော်ပိုင် ရေနံနှင့်ဓာတ်ငွေ့ကုမ္ပဏီ “Zarubezhneft” မှ နိုင်ငံတကာဆက်ဆံရေးဌာနအကြီးအကဲ Mr. Alesksander Boldyrev တို့ ပါဝင်ခဲ့တယ်လို့ သိရပါတယ်။ အဆိုပါဆွေးနွေးမှုအတွင်း LNG Terminal မှတစ်ဆင့် ဆက်သွယ်မယ့် သဘာဝဓာတ်ငွေ့ပိုက်လိုင်းများ တည်ဆောက်နိုင်ရန်ကိစ္စများတွင် ရင်းနှီးမြှုပ်နှံရေးနှင့် ထားဝယ်အထူးစီးပွားရေးဇုန်မှာ ရေနံချက်စက်ရုံ တည်ဆောက် ရန်အတွက် ရင်းနှီးမြှုပ်နှံရေးတို့ ပါဝင်သလို မြန်မာနိုင်ငံ၏ စက်သုံးဆီလိုအပ်ချက်များကို သက်သာသောဈေးနှုန်း (friendly price) နဲ့ရရှိနိုင်ရန် ကူညီဆောင်ရွက်ပေးရေးလည်း ပါဝင်တယ်လို့ သိရပါတယ်။ ဒါ့အပြင် ရေနံနှင့်သဘာဝဓာတ်ငွေ့ရှာဖွေတူးဖော်ထုတ်လုပ်ရေးမှာ အဆင့်မြင့်နည်းပညာများ အသုံးပြုနိုင်ရန် အကူအညီပေးရေးနှင့် အလားအလာကောင်းများရှိနေတဲ့ ကမ်းလွန်လုပ်ကွက်များမှာ ရုရှားကုမ္ပဏီများမှ ရင်းနှီးမြှုပ်နှံ ကာ ပူးပေါင်းဆောင်ရွက်ရန်အတွက် ဖြစ်နိုင်ခြေဆန်းစစ်ခြင်းကို လာရောက်ဆောင်ရွက်ရေးကိစ္စရပ်များလည်း ပါဝင် တယ်လို့ သိရပါတယ်။ (NVS 004)