စိုက်ပျိုးရေးနှင့် စီးပွားရေးဖွံ့ဖြိုးတိုးတက်မှု အထောက်အပံ့ရရှိစေရန် ရည်ရွယ်၍ မြန်မာနိုင်ငံနှင့် အိန္ဒိယ၊ ကနေဒါ၊ စင်ကာပူ၊ မလေးရှား၊ တောင်အာဖရိက စတဲ့ ၅ နိုင်ငံမှ စီးပွားရေးလုပ်ငန်းရှင်များ တွေ့ဆုံဆွေးနွေးပွဲကို ရန်ကုန်မြို့ မင်္ဂလာတောင်ညွန့်မြို့နယ် ကန်ရိပ်သာလမ်းရှိ Esperado Lake View Hotel ၌ မတ်လ ၃ ရက်မှ ၅ ရက်နေ့အထိ ၃ ရက်တိုင်တိုင် ကျင်းပပြုလုပ်ခဲ့တယ်လို့ သိရပါတယ်။ အဆိုပါ တွေ့ဆုံဆွေးနွေးပွဲကို မြန်မာ-အိန္ဒိယချစ်ကြည်ရေးနှင့် ဖွံ့ဖြိုးတိုးတက်ရေးအသင်းက ဦးဆောင်ကျင်းပ ခဲ့တာဖြစ်ပြီး ၎င်း နိုင်ငံ ၅ နိုင်ငံမှ စီးပွားရေးကိုယ်စားလှယ်များ တက်ရောက်ခဲ့ကာ ဆွေးနွေးပွဲအတွင်း မြန်မာနိုင်ငံရဲ့ စိုက်ပျိုးရေးကဏ္ဍ ဖွံ့ဖြိုးတိုးတက်ရေးအတွက် နည်းပညာ၊ ရင်းနှီးမြှုပ်နှံမှု စသဖြင့် အထောက်အပံ့ရရှိစေမယ့် ကဏ္ဍတွေကို ဆွေးနွေးခဲ့ကြတယ်လို့ သိရပါတယ်။ အဆိုပါ အိန္ဒိယ၊ ကနေဒါ၊ စင်ကာပူ၊ မလေးရှားနဲ့ တောင်အာဖရိက နိုင်ငံတွေရဲ့ စီးပွားရေးလုပ်ငန်းရှင်တွေနဲ့တွေ့ဆုံခြင်းဟာ မြန်မာနိုင်ငံအတွက် စိုက်ပျိုးရေးနဲ့မွေးမြူရေးဆိုင်ရာ ပူးပေါင်းဆောင်ရွက်မှုရလဒ်ကောင်းတွေ ထွက်ပေါ်လာစေမှာဖြစ်သလို အပြန်အလှန်လက်တွဲပူးပေါင်းဆောင်ရွက် သွားခြင်းကြောင့် အကျိုးကျေးဇူးများစွာရရှိမှာဖြစ်တယ်လို့ သိရပါတယ်။ ထိုကဲ့သို့ ကွန်ဖရင့်တွေ များစွာဆောင်ရွက်ခြင်းအားဖြင့် နိုင်ငံတကာနဲ့ပတ်သက်တဲ့ စာတမ်းတွေ ထွက်လာစေ မှာဖြစ်ပြီး ဖွံ့ဖြိုးတဲ့နိုင်ငံတွေနဲ့ချိတ်ဆက်ပြီး ဆောင်ရွက်တာဖြစ်တဲ့အတွက် အကြံဉာဏ်ကောင်း များစွာရရှိတဲ့အပြင် မိတ်ဆွေနိုင်ငံများစွာလည်း တိုးပွားစေမှာဖြစ်တယ်လို့လည်း ဆိုပါတယ်။ မြန်မာနိုင်ငံနဲ့ စိုက်ပျိုးရေးကဏ္ဍ လက်တွဲ ဆောင်ရွက်ဖို့အတွက် အထက်ပါကွန်ဖရင့်တွေကို မလေးရှားနဲ့အိန္ဒိယနိုင်ငံမှာ ဆက်လက်ကျင်းပမှာ ဖြစ်သလို လာမယ့် ဒီဇင်ဘာလမှာတော့ မြန်မာနိုင်ငံမှာကျင်းပဖို့ သဘောတူထားတာလည်း ရှိတယ်လို့ သိရပါတယ်။ (NVS 004)