ဘဏ္ဍာရေးဆိုင်ရာကော်မရှင် ဒုတိယဥက္ကဋ္ဌ၊ နစကဒုတိယဥက္ကဋ္ဌ၊ ဒုတိယဝန်ကြီးချုပ် ဒုတိယဗိုလ်ချုပ်မှူးကြီး စိုးဝင်း က ပြီးခဲ့တဲ့ မတ်လ ၅ ရက်က နေပြည်တော်မှာ ၂၀၂၅-၂၀၂၆ ဘဏ္ဍာရေးနှစ် ပြည်ထောင်စု၏ အရအသုံး ခန့်မှန်းခြေငွေစာရင်းများ စိစစ်ခြင်းဆိုင်ရာ ညှိနှိုင်းအစည်းအဝေးမှာ ဝန်ကြီးဌာနများအနေဖြင့် အသုံးစရိတ်များ တင်ပြတောင်းခံရာတွင် စနစ်တကျ စိစစ်ပြီးမှသာ တင်ပြကြစေလိုပြီး ဝန်ကြီးဌာနများနှင့် အဖွဲ့အစည်းများအနေဖြင့် ရရှိနိုင်သည့်ဘဏ္ဍာငွေကို အပြည့်အဝရရှိရေး ဆောင်ရွက်ကြရန်နှင့် သုံးစွဲမှုအပိုင်းတွင်လည်း အလေအလွင့်မရှိအောင် စိစစ်ဆောင်ရွက် သွားကြရမယ်လို့ အသိပေးပြောကြားခဲ့ပါတယ်။ ဆက်လက်ပြီး ဘဏ္ဍာရေးနှစ် တစ်နှစ်ကုန်ဆုံးချိန်နီးမှသာ အကြောင်းအမျိုးမျိုးကြောင့် စီမံကိန်းများ ပြီးစီးအောင် မဆောင်ရွက်နိုင်ခြင်း၊ တချို့လုပ်ငန်းများ မစတင်နိုင်ခြင်း စသည့်အကြောင်းပြချက်များဖြင့် ပိုလျှံငွေများ ပြန်လည်အပ်နှံသည့်အတွက် နိုင်ငံတော်၏ အထွေထွေပိုလျှံငွေများစွာ ဖြစ်ပေါ်နေသည်ကို တွေ့ရကြောင်း၊ ဒါကြောင့် ရငွေအပိုင်းနှင့် အသုံးစရိတ်အပိုင်းအပေါ်မူတည်ပြီး ဂျီဒီပီကို တွက်ချက်ရသည်ဖြစ်၍ လိုငွေနှင့်ဂျီဒီပီ အချိုးကို နှိုင်းယှဉ် ရတဲ့အပိုင်းတွင် သုံးစွဲတဲ့ငွေအပိုင်း၌ ရငွေများအားလုံး မသုံးစွဲနိုင်ပါက ရငွေသုံးစွဲမှုအပေါ်မူတည်၍ ဂျီဒီပီလျော့နည်း သကဲ့သို့ အမှန်တကယ်သုံးစွဲရန်လိုအပ်သည့် ဝန်ကြီးဌာနမှ အဆိုပါငွေကို စောစီးစွာသုံးစွဲနိုင်ပါက စီမံကိန်းနှင့်လုပ်ငန်း များ ပြီးစီးသွားမှာဖြစ်ပြီး ယင်းဝန်ကြီးဌာန၏ ဂျီဒီပီမှာလည်း တိုးတက်လာမှာဖြစ်တယ်လို့ ပြောကြားခဲ့ ပါတယ်။ ၂၀၂၄-၂၀၂၅ ဘဏ္ဍာရေးနှစ်၏ အရအသုံး ခန့်မှန်းခြေငွေစာရင်းများအပေါ် သုံးသပ်ကြည့်ပါက နိုင်ငံတော်၏ စီးပွားရေးနှင့်ပတ်သက်၍ ဝင်ငွေရှာဖွေပေးရတဲ့ သက်ဆိုင်ရာဝန်ကြီးဌာနအချို့နှင့် အဖွဲ့အစည်းအချို့အနေနဲ့ အကြောင်းအမျိုးမျိုးကြောင့် သတ်မှတ်လျာထားတဲ့ ရငွေပိုင်းပြည့်မီခြင်းမရှိတာများကို တွေ့ရှိရသကဲ့သို့ သုံးစွဲတဲ့ အသုံးစရိတ်ပိုင်းမှာလည်း မလိုအပ်ဘဲ လိုရမယ်ရ တင်ပြတောင်းခံထားခြင်းများ၊ အချို့စီမံကိန်းပြီးနိုင်သည်ဟု ယူဆပြီး တောင်းခံသည်များရှိခဲ့ကြောင်း ဘဏ္ဍာရေးဆိုင်ရာကော်မရှင်ကနေ သိရပါတယ်။ အစည်းအဝေးသို့ ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးကိုကို၊ ပြည်ထောင်စုဝန်ကြီးများ ဖြစ်ကြတဲ့ ဦးဝင်းရှိန်၊ ဒေါက်တာချာလီသန်းနှင့် Jeng Phang နော်တောင်၊ ပြည်ထောင်စုစာရင်းစစ်ချုပ် ဒေါက်တာခင်နိုင်ဦး၊ ဒုတိယဝန်ကြီး ဦးမင်းထွဋ်နှင့် တာဝန်ရှိသူများ တက်ရောက်ကြပြီး ပြည်ထောင်စုအဆင့်ပုဂ္ဂိုလ်များ၊ ပြည်ထောင်စုဝန်ကြီးများ၊ နေပြည်တော်ကောင်စီဥက္ကဋ္ဌ၊ ဒုတိယဝန်ကြီးများနှင့် တာဝန်ရှိသူများက ဗီဒီယိုကွန်ဖရင့်ဖြင့် တက်ရောက်ခဲ့ကြပါတယ်။ (NVS 004)