အလုပ်သမားဝန်ကြီးဌာနက မြန်မာ-ရုရှား နှစ်နိုင်ငံချစ်ကြည်ရင်းနှီးမှုကို ရေရှည်တည်တံ့ခိုင်မြဲစေရေးနှင့် မြန်မာ နိုင်ငံမှလုပ်သားများ အလုပ်အကိုင်အခွင့်အလမ်းအသစ်များ ရှာဖွေနိုင်ရေးအတွက် ရုရှားဖက်ဒရေးရှင်းနိုင်ငံနှင့် အလုပ်သမားရေးရာကိစ္စရပ်များတွင် ပူးပေါင်းညှိနှိုင်းဆောင်ရွက်လျက်ရှိပါတယ်။ မြန်မာလုပ်သားများအတွက် အလုပ်အကိုင်အခွင့်အလမ်းများ ရရှိစေနိုင်ရန်နှင့် လုပ်ခလစာပိုမိုကောင်းမွန်သည့် နိုင်ငံများသို့ လုပ်သားများစေလွှတ်ခြင်းဖြင့် လုပ်သားဈေးကွက် တိုးချဲ့ရှာဖွေနိုင်ရန်အတွက် ရုရှားဖက်ဒရေးရှင်းနိုင်ငံသို့ Pilot Project ဖြင့်စေလွှတ်နိုင်ရေး စီစဉ်ဆောင်ရွက်ခဲ့ရာ ပြည်ပအလုပ်အကိုင်အကျိုးဆောင် လိုင်စင်ရအေဂျင်စီဖြစ်သည့် Vista International Co.,Ltd ၏ အစီအစဉ်ဖြင့် ရုရှားဖက်ဒရေးရှင်းနိုင်ငံ Joint-Stock Company "Inturd" Co.,Ltd သို့ ကျွမ်းကျင်မြန်မာလုပ်သား ၅၄ ဦးအနက် ကနဦးအစီအစဉ်ဖြင့် လုပ်သား ၂၄ ဦးအား Pilot Project စေလွှတ်ခဲ့ပါတယ်။ ထိုကဲ့သို့ စေလွှတ်နိုင်ရေးအတွက် ပြီးခဲ့တဲ့ ဖေဖော်ဝါရီလ၂၈ ရက်က အလုပ်ရှင်၊ အလုပ်သမား အလုပ်ခန့်ထားမှု ဆိုင်ရာ သဘောတူစာချုပ်ချုပ်ဆိုခြင်း မတ်လ ၃ ရက်တွင် ပြည်ပအလုပ်အကိုင် လမ်းညွှန်သင်တန်း သင်ကြားပို့ချခြင်းနှင့် ပြည်ပအလုပ်အကိုင် အလုပ်သမားသက်သေခံကတ်(OWIC) ပြုလုပ်ပေးခြင်းများကို လုပ်ထုံးလုပ်နည်းများနှင့်အညီ ဆောင်ရွက်ပေးခဲ့ပြီး မတ်လ ၄ ရက်က ရုရှားဖက်ဒရေးရှင်းနိုင်ငံသို့ Pilot Project အဖြစ် စနစ်တကျစေလွှတ်နိုင်ခဲ့ပါ တယ်။ ဒါ့အပြင် မြန်မာနိုင်ငံအလုပ်သမားဝန်ကြီးဌာနနှင့် ရုရှားဖက်ဒရေးရှင်းနိုင်ငံ အလုပ်သမားနှင့်လူမှုကာကွယ် စောင့်ရှောက်ရေးဝန်ကြီးဌာနတို့အကြား အလုပ်သမားရေးရာ ပူးပေါင်းဆောင်ရွက်ခြင်းဆိုင်ရာ နားလည်မှုစာချွန်လွှာ (MoU) လက်မှတ်ရေးထိုးနိုင်ရေး ညှိနှိုင်းဆောင်ရွက်လျက်ရှိပြီး MoU လက်မှတ်ရေးထိုးရခြင်း မရှိသေးသော်လည်း နှစ်နိုင်ငံချစ်ကြည်ရင်းနှီးမှုဖြင့် Pilot Project ဖြင့် စေလွှတ်ခြင်းဖြစ်ပြီး အနာဂတ်တွင် အလုပ်သမားဈေးကွက်ရရှိ၍ အလုပ်သမားများ အလုပ်အကိုင်အခွင့်အလမ်းများရရှိခြင်း၊ အလုပ်သမားနှင့် မိသားစုဝင်များ၏ လူမှုစီးပွားဘဝ ကောင်းမွန် တိုးတက်ခြင်းစတဲ့ အကျိုးကျေးဇူးများရရှိလာနိုင်မည်ဖြစ်ကြောင်း သိရပါတယ်။ (NVS-004)