မြန်မာနိုင်ငံဆိုင်ရာ ဩစတြေးလျသံရုံးရဲ့ ကူညီထောက်ပံ့မှုဖြင့် အပြည်ပြည်ဆိုင်ရာ အမျိုးသမီးများနေ့ အထိမ်းအမှတ်အဖြစ် ‘Women in Cities’ အစီအစဉ်ကို မတ်လ ၈ ရက်တွင် ဘိုကလေးဈေးလမ်း၊ ဗိုလ်တထောင် မြို့နယ်ရှိ YWCA ခန်းမမှာ နေ့လယ် ၁ နာရီမှ ၄ နာရီခွဲအထိ (စကားဝိုင်းနှင့် အခြားအစီအစဉ်များ)၊ မနက် ၁၀ နာရီမှ နေ့လယ် ၄ နာရီခွဲအထိ (Pop-up Market) အစီအစဉ်ပြုလုပ်သွားမည်ဖြစ်ကြောင်း သိရပါတယ်။ မြန်မာနိုင်ငံဆိုင်ရာ ဩစတြေးလျသံရုံးနှင့်အတူ ဒို့အိမ်နှင့် မြို့ပြပုံဖော်သူလူငယ်များက အပြည်ပြည်ဆိုင်ရာ အမျိုးသမီးများနေ့ အထိမ်းအမှတ်အဖြစ် "Women in Cities - မြို့ပြနေအမျိုးသမီးများ" ခေါင်းစဉ်ပေးထားတဲ့ အစီအစဉ်ကို အပြည်ပြည်ဆိုင်ရာအမျိုးသမီးများနေ့ဖြစ်တဲ့ မတ်လ ၈ ရက်မှာကျင်းပပြုလုပ်သွားမှာ ဖြစ်ပါတယ်။ အဆိုပါ "Women in Cities - မြို့ပြနေ အမျိုးသမီးများ" အစီအစဉ်မှာ “Women Thriving Across Diverse Industries” အမည်ရ စကားဝိုင်းပါဝင်မည်ဖြစ်ပြီး ယင်းစကားဝိုင်းတွင် နယ်ပယ်အသီးသီးမှ အမျိုးသမီးများ အနေဖြင့် ၎င်းတို့၏ သက်ဆိုင်ရာ လုပ်ငန်းခွင်ကိုယ်စီတွင် ကြုံတွေ့ရလေ့ရှိသည့် စိန်ခေါ်မှုများနှင့်အတူ အမျိုးသမီးများအတွက် ခွန်အားဖြစ်စေမည့် အသိအမြင်များကိုပါ မျှဝေသွားမည်ဖြစ်ကြောင်း သိရပါတယ်။ ဒါ့အပြင် အမျိုးသမီးများဦးစီးတဲ့ လုပ်ငန်းငယ်များက ထုတ်ကုန်များကို ဝယ်ယူအားပေးနိုင်မည့် Pop-up Market အပါအဝင် ဉာဏ်စမ်းမေးခွန်းများဖြေဆိုပြီး အမှတ်တရ ဆုလက်ဆောင်များ ရယူနိုင်မည့် အစီအစဉ်များ အစရှိသည်တို့ပါဝင်မည်ဖြစ်ကြောင်း သိရပါတယ်။ (NVS 004)