ပြင်ဦးလွင်ဒေသထွက်ကုန်များ ပြည်ပဈေးကွက်ကိုထိုးဖောက်နိုင်ရန် အရည်အသွေးထိန်းသိမ်းမှုများကို ဆောင်ရွက်နေကြောင်း အသေးစားနှင့်အလတ်စားလုပ်ငန်းများဖွံ့ဖြိုးတိုးတက်ရေးဌာနမှ သိရပါတယ်။ အဆိုပါ ဒေသမှထွက်ရှိသည့် ကော်ဖီ၊ ဝိုင် နှင့် ယိုမျိုးစုံ စတဲ့ ဒေသထွက်ပစ္စည်းများဟာ ပြည်တွင်းဈေးကွက် ရရှိထားခြင်းကြောင့် ပြည်တွင်းစားသုံးမှုသာမက ပြည်ပသို့ တင်ပို့နိုင်ရေးနှင့် ပြည်ပ ဈေးကွက်ထိုးဖောက်နိုင်ရန် ကူညီပံ့ပိုးမှုများ ဆောင်ရွက်ပေးလျက်ရှိကြောင်း သိရပါတယ်။ လက်ရှိတွင် ပြင်ဦးလွင်မြို့နယ်ရှိ Favourite ကော်ဖီ ထုတ်လုပ်ခြင်းလုပ်ငန်းကို အရည်အသွေးထိန်းသိမ်းရေးအတွက် လုပ်ငန်းစဉ်အဆင့်ဆင့် ဆောင်ရွက်၍ ကော်ဖီမှုန့်များ ကို ထုတ်လုပ်လျက်ရှိကြောင်းလည်း သိရပါတယ်။ ဌာနအနေဖြင့် ပုဂ္ဂလိကစက်မှုလုပ်ငန်းဥပဒေအရ မန္တလေးတိုင်းဒေသကြီး၊ ပြင်ဦးလွင်မြို့နယ်အတွင်းရှိ အကြီးစားလုပ်ငန်း ၅၃ ခု၊ အလတ်စားလုပ်ငန်း ၆၄ ခုနှင့် အငယ်စားလုပ်ငန်း ၄၂ ခု၊ စုစုပေါင်းလုပ်ငန်း ၁၅၉ ခုအား ပုဂ္ဂလိကစက်မှုလုပ်ငန်းမှတ်ပုံတင်များ ထုတ်ပေးထားနိုင်ခဲ့ကြောင်း ဌာနမှ အသေးစားစီးပွားရေးလုပ်ငန်း ၇၇ ခု၊ အလတ်စားစီးပွားရေးလုပ်ငန်း ၂၈ ခု၊ စုစုပေါင်း ၁၀၅ ခုကိုလည်း SME member ကတ်နှင့် ယာယီမှတ်ပုံ တင်လက်မှတ်များ ထုတ်ပေးနိုင်ခဲ့ပြီးဖြစ်ကြောင်း သိရပါတယ်။ ဒါ့အပြင် နိုင်ငံ့စီးပွားမြှင့်တင်ရေးရန်ပုံငွေကျပ် ၈ ဘီလီယံမှလည်း MSMEနှင့် အခြားကဏ္ဍများရှိ လုပ်ငန်းရှင် ၆ ဦးအား ချေးငွေကျပ်သန်း ၂၃၁ ဒသမ ၀၃ အား ထုတ်ချေးပေးနိုင်ခဲ့ကြောင်းလည်း သိရပါတယ်။ (NVS 004)