“မယ်ဆိုင်ချောင်းရေမြင့်တက်မှုကာကွယ်ရန် ရေထိန်းနံရံများ စတင်တည်ဆောက်”
06 Mar
ထိုင်း-မြန်မာနယ်စပ် တာချီလိတ်မြို့တွင် နှစ်စဉ် ကြုံတွေ့နေရသည့် မယ်ဆိုင်ချောင်းရေ မြင့်တက်မှုကို ကာကွယ်ရန် ကျပ်သန်း ၁,၀၀၀ ကုန်ကျခံမည့် ကျောက်စီရေထိန်းနံရံများကို မတ်လ ၄ ရက်က စတင် တည်ဆောက် နေပြီဖြစ်ကြောင်း သိရပါတယ်။ အဆိုပါတည်ဆောက်ခြင်းလုပ်ငန်းကို တာချီလိတ်မြို့၊ ပုန်းထွန်ရပ်ကွက် နှင့် တာလော့ရပ်ကွက်အတွင်း ရေကြီးရေလျှံမှု ကာကွယ်နိုင်ရေးအတွက် တည်ဆောက်ခြင်းဖြစ်ကြောင်း သိရပါတယ်။ အခုလိုတည်ဆောက်ခြင်း လုပ်ငန်းများအတွက် ၂၀၂၄ - ၂၀၂၅ ခုနှစ် ရှမ်းပြည်နယ် အစိုးရအဖွဲ့၏ ခွင့်ပြုရန်ပုံငွေ ကျပ်သန်း ၁,၀၀၀ ဖြင့် တည်ဆောက်ခြင်း ဖြစ်ပါတယ်။ ပြီးခဲ့သည့် နှစ်အတွင်း တာချီလိတ်မြို့၌ ရေကြီးရေလျှံမှုများဖြစ်ပွားခဲ့ရာ ပျက်စီးဆုံးရှုံးမှုများရှိခဲ့ခြင်းကြောင့် ယခုနှစ် ထိုင်း- မြန်မာနယ်စပ် အမှတ် (၁) ချစ်ကြည်ရေးတံတားဘေးနှင့် အောက်ဘက်တို့မှာ သံကူကွန်ကရစ် ကျောက်စီမြေထိန်းနံရံ တည်ဆောက်ခြင်းနှင့် အလူရာဟိုတယ်အနောက်ဘက်အခြမ်းမှာလည်း သံကူကွန်ကရစ် ကျောက်စီမြေထိန်းနံရံ တည်ဆောက်ခြင်းများ ဆောင်ရွက်နေခြင်းဖြစ်ကြောင်း သိရပါတယ်။ (NVS 004)
