(၇၉)နှစ်မြောက် မြန်မာနိုင်ငံရုပ်ရှင်အစည်းအရုံး နှစ်ပတ်လည်နေ့အခမ်းအနားကို မတ်လ ၈ ရက်မှာ ရန်ကုန်မြို့၊ ဗဟန်းမြို့နယ်၊ ဝင်္ကဘာလမ်းရှိ မြန်မာနိုင်ငံရုပ်ရှင်အစည်းအရုံးတွင် နံနက် ၉ မှ ညနေ ၆ နာရီအထိ ကျင်းပပြုလုပ်သွားမယ်လို့ မြန်မာနိုင်ငံရုပ်ရှင်အစည်းအရုံး တာဝန်ရှိသူတစ်ဦးထံမှ သိရပါတယ်။ အဆိုပါ နှစ်ပတ်လည်နေ့အခမ်းအနားတွင် မြန်မာ့ရုပ်ရှင်ဖခင်ကြီးများ၏ ကြေးရုပ်များနှင့် ရာပြည့် ရင်ပြင်တို့ကိုပါ တစ်ချိန်တည်းဖွင့်လှစ်မှာဖြစ်ပြီး ရုပ်ရှင်အစည်းအရုံးရဲ့ ရွှေရတုခန်းမမှာတော့ မြန်မာနိုင်ငံ ရုပ်ရှင်အစည်းအရုံး ရုပ်ရှင်ပညာသင်တန်းဆင်းများစကားဝိုင်း၊ ဗီဒီယိုခေတ်သရုပ်ဆောင်များ တွေ့ဆုံ စကားဝိုင်းနှင့် ခေတ်အဆက်ဆက် ရွှေကြိုမောင်မယ်များရဲ့ စကားဝိုင်းများကို ထည့်သွင်းကျင်းပသွားမှာ ဖြစ်တဲ့အပြင် ခေတ်ဟောင်းဂန္ထဝင် ရုပ်ရှင်ကားဖြစ်တဲ့ “ငဘ” ရုပ်ရှင်ဇာတ်ကားကို ပြသပေးသွားမှာ ဖြစ်ပါတယ်။ နှစ်ပတ်လည်နေ့ ညနေပိုင်းမှာ ပျော်ပွဲရွှင်ပွဲအခမ်းအနားကို မြန်မာနိုင်ငံရုပ်ရှင်အစည်းအရုံး ပရဝုဏ် အတွင်းမှာ ညနေ ၃ နာရီမှ ၆ နာရီအထိ ကျင်းပပြုလုပ်သွားမှာဖြစ်ပါတယ်။ ပျော်ပွဲရွှင်ပွဲအခမ်းအနားမှာ နွမ်းပါးသော အစည်းအရုံးဝင်များကို ဆုငွေကျပ် ၁ သောင်းမှ ၅ သိန်းအထိ ဗလာမပါကံစမ်းမဲများ မဲဖောက်ပေးမည့်အပြင် ကာရာအိုကေသီဆိုခြင်း၊ နိဗ္ဗာန်ဈေးများ၊ ဂိမ်းကစားနည်းများကို ထည့်သွင်းကျင်းပ သွားမှာဖြစ်ပါတယ်။ အဆိုပါနှစ်ပတ်လည်အခမ်းအနားနဲ့ မြန်မာ့ရုပ်ရှင်သမိုင်းပြတိုက်ကို ဖွင့်လှစ်ပေးထားမှာ ဖြစ်ပြီး ဝင်ကြေး ၁,၀၀၀ ကျပ်နှုန်းနဲ့ ဝင်ရောက်ကြည့်ရှုနိုင်မှာ ဖြစ်တယ်လို့လည်း သိရပါတယ်။ ဒါ့အပြင် မြန်မာနိုင်ငံရုပ်ရှင်အစည်းအရုံး (၇၉) နှစ်မြောက် နှစ်ပတ်လည်နေ့ကို ဂုဏ်ပြုသောအားဖြင့် မြန်မာ့ရုပ်ရှင်ရက်သတ္တပတ်အဖြစ် ၂၀၂၄ ခုနှစ်အတွက် အကယ်ဒမီဆုရရှိခဲ့တဲ့ ရုပ်ရှင်ဇာတ်ကားများကို အမှတ် (၁၅)၊ မိုးကောင်းလမ်း၊ ရန်ကင်းမြို့နယ်ရှိ STAR Cinema (မြဝတီမီဒီယာစင်တာ)မှာ ပြန်လည်ပြသ သွားမယ်လို့ သိရပါတယ်။ ပြန်လည်ပြသမယ့် အကယ်ဒမီဆုရရှိခဲ့တဲ့ ရုပ်ရှင်ဇာတ်ကားများမှာ မတ်လ ၉ ရက်မှ ၁၁ ရက်အထိ ‘ဘိုးတော်ကင်း’ဇာတ်ကား၊ မတ်လ ၁၃ ရက်မှ ၁၅ ရက်အထိ ‘ချစ်သူသာ ပန်းတစ်ပွင့်ဖြစ်ခဲ့လျှင်’၊ မတ်လ ၁၆ ရက်မှ ၁၈ ရက်အထိ ‘မီး’ဇာတ်ကား၊ မတ်လ ၂၀ ရက်မှ ၂၂ ရက်အထိ ‘နှောင်’ဇာတ်ကား၊ မတ်လ ၂၃ ရက်မှ ၂၅ ရက်အထိ ‘အိပ်မက်ကာရန်’ ဇာတ်ကားနှင့် မတ်လ ၂၇ ရက်မှ ၂၉ ရက်အထိ ‘တိမ်ပန်းချီ’ဇာတ်ကား တို့ကို ဖော်ပြပါရက်များအလိုက် နေ့စဉ် မွန်းလွဲ ၁ နာရီနှင့် ညနေ ၄ နာရီတို့မှာ ပွဲချိန် ၂ ချိန်စီ ပြသသွားမှာဖြစ်ကာ ရုံဝင်ကြေးအဖြစ် ငွေကျပ် ၁၀,၀၀၀ နှင့် ၅၀၀၀ တို့ကို သတ်မှတ်ထားကြောင်း သိရပါတယ်။ (NVS 008)