ကျန်းမာရေးဝန်ကြီးဌာန ရုံးအမှတ် (၄) Meeting Hall မှာ မတ်လ ၃ ရက်က ကျင်းပတဲ့ ဆေးလိပ်နှင့် ဆေးရွက်ကြီးထွက်ပစ္စည်း သောက်သုံးမှုထိန်းချုပ်ရေးဗဟိုအဖွဲ့ အစည်းအဝေး (၂/၂၀၂၅) မှာ ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခ ဒေါက်တာသက်ခိုင်ဝင်း က အများပြည်သူတို့၏ကျန်းမာရေးကို ထိခိုက်စေတဲ့ အန္တရာယ်မှ ကာကွယ်ရန်အတွက် ဆေးလိပ်ငွေ့ကင်းစင်နယ်မြေနှင့် ဒေသများထူထောင်ရေးကို အကောင်အထည် ဖော် ဆောင်ရွက်လျက်ရှိကြောင်း ပြောကြားခဲ့ပါတယ်။ ဒါ့အပြင် လူငယ်များအကြားတွင် ရေပန်းစားလျက်ရှိသည့် E-cigarette နဲ့ Vape အစရှိတဲ့ အီလက်ထရွန်နစ် အငွေ့ရှူစက်များနဲ့ပတ်သက်၍လည်း ဥပဒေအရ ထိန်းချုပ်ဆောင်ရွက်နိုင်ရေးအတွက်ကိုလည်း စီစဉ်ဆောင်ရွက်နေ တယ်လို့ ဆိုပါတယ်။ ဆေးလိပ်နှင့် ဆေးရွက်ကြီးထွက်ပစ္စည်း သုံးစွဲမှုကြောင့် နှလုံးသွေးကြောကျဉ်းရောဂါ၊ သွေးတိုး ရောဂါ၊ ဆီးချိုရောဂါ၊ လေဖြတ်ရောဂါ၊ ကင်ဆာရောဂါ၊ နာတာရှည်အဆုတ်နှင့် အသက်ရှူလမ်းကြောင်းရောဂါ စတဲ့ မကူးစက်နိုင်သောရောဂါများ ဖြစ်ပွားရခြင်း၏ အဓိကအကြောင်းရင်းတစ်ရပ်ဖြစ်ကြောင်းလည်း ဆက်လက်ပြောကြား ခဲ့ပါတယ်။ အဆိုပါ မကူးစက်နိုင်သောရောဂါများဖြစ်ပွားသေဆုံးမှုဟာ ကမ္ဘာတစ်ဝန်းတွင် ကပ်ရောဂါအသွင်ဖြင့်တိုးတက် များပြားလာကာ ပြည်သူ့ကျန်းမာရေးကို များစွာထိခိုက်စေကြောင်းလည်း သတိပေးပြောကြားခဲ့ပါတယ်။ ဒါ့အပြင် ကျန်းမာရေးဝန်ကြီးဌာနမှ ထုတ်ပြန်ကြေညာခဲ့သည့် “ဆေးလိပ်နှင့် ဆေးရွက်ကြီးထွက်ပစ္စည်းများကို စံသတ်မှတ် ချက်များနဲ့အညီ ထုပ်ပိုးခြင်းနှင့် ကျန်းမာရေးသတိပေးရုပ်ပုံများ၊ စာသားများကို ပုံနှိပ်ဖော်ပြခြင်းဆိုင်ရာအမိန့်”က ၂၀၂၄ ခုနှစ် ဒီဇင်ဘာလ ၃၁ ရက်တွင် စတင်အာဏာသက်ဝင်ခဲ့ပြီးဖြစ်ကြောင်းနှင့် အမိန့်စာကို လုပ်ငန်းရှင်များက လိုက်နာဆောင်ရွက်နိုင်ရေးနဲ့ပတ်သက်၍လည်း သက်ဆိုင်ရာဝန်ကြီးဌာနများ၊ ဦးစီးဌာနများအနေဖြင့် ဆက်လက် ဆောင်ရွက်ရန်ကိစ္စရပ်များကို အားဖြည့်ဆောင်ရွက်ပေးရန် ပြည်ထောင်စုဝန်ကြီးက တိုက်တွန်းမှာကြားခဲ့တယ်လို့ သိရပါတယ်။ (NVS 004)