နှစ်စဉ် ကျင်းပမြဲဖြစ်တဲ့ စောမွန်လှဆွေတော်မျိုးတော်များ၏ ရှင်အပါး ၃၀၀ စုပေါင်းရှင်ပြုပွဲကြီးကို မတ်လ ၂၀ ရက်နှင့် ၂၁ ရက်တို့တွင် စည်ကားသိုက်မြိုက်စွာကျင်းပသွားမှာဖြစ်ကြောင်း သိရပါတယ်။ နဂါးကိုးကောင်ဆရာတော် မဟာသဒ္ဓမ္မ ဇောတိကဓဇ ဘဒ္ဒန္တရာဇိန္ဒက စောမွန်လှပေါ်တော်မူ ဘုန်းတော်ကြီးသင် ပညာရေးကျောင်းကို ခရစ်သက္ကရာဇ် ၂ဝဝဝ ပြည့်နှစ်တွင် တည်ထောင်ခဲ့ပြီး ခရစ်သက္ကရာဇ် ၂၀၀၆ ခုနှစ်မှ စတင်၍ ကျောင်းသားမိဘများ၊ သားရှင်၊ သမီးရှင် ဗုဒ္ဓဘာသာဖြစ်တဲ့ မြန်မာလူမျိုးများအနေနဲ့ သာသနာ့အမွေကို ခံယူထိုက်စေရန် အတွက် ရည်ရွယ်ကာ စုပေါင်းရှင်ပြုပွဲကြီးကို ကျင်းပခြင်းဖြစ်ပါတယ်။ အဆိုပါ စုပေါင်းရှင်ပြုပွဲကြီးကို ပထမနှစ်တွင် ရှင်အပါး ၅ဝ မှ စတင်ခဲ့ပြီး သုံးလေးနှစ်အတွင်း ရှင်အပါး ၁၀၀၊ ရှင်အပါး ၂၀၀ စသည်ဖြင့် ကျောင်းသားမိဘများ၏ လိုအပ်ချက်အရ တိုးချဲ့ဆောင်ရွက်ခဲ့ရာ ရှင်အပါး ၃၀၀ အထိ ရောက်ရှိလာခဲ့ပြီဖြစ်ပါတယ်။ ယခုအခါမှာတော့ နဂါးကိုးကောင်ဆရာတော်၏ဦးစီးမှုဖြင့် (၁၉) ကြိမ်မြောက် ရှင်အပါး ၃၀၀ စုပေါင်းရှင်ပြုပွဲကြီးကို လာမယ့် မတ်လ ၂၀ ရက်(တပေါင်းလပြည့်ကျော် ၇ ရက်) အလှူဝင်နေ့တွင် ချပ်ဝတ် တန်ဆာအပြည့်အစုံဖြင့် မြင်းများ၊ ရွှေလှည်းယာဉ်၊ ငွေလှည်းယာဉ်များ ခြံရံကာ မင်းမြောက်တန်ဆာဆင်ယင် အပ်သော ရှင်သာမဏေလောင်းများ၊ နားထွင်းများကို မင်းခမ်းမင်းနားဖြင့် လှည့်လည်ပြီး ရှစ်ပါးပရိက္ခရာစုံလင်စွာဖြင့် သာသနာ့ဘောင်တွင်း သွတ်သွင်းချီးမြှောက်၍ ဧည့်ပရိသတ်အပေါင်းအား စတုဒိသာများကျွေးမွေးဧည့်ခံသွားမှာ ဖြစ်ပါတယ်။ မတ်လ ၂၁ ရက် (တပေါင်းလပြည့်ကျော် ၈ ရက်)၊ နံနက်ပိုင်းမှာတော့ အလှူကြီးဧည့်ခံပွဲပြုလုပ်ကာ ရေစက် သွန်းချသာသနာ့အမွေခံယူစေမှာဖြစ်လို့ ပဋ္ဌာန်းဆက်ဆွေတော်မျိုးတော်များ သာသနာ့အမွေခံ အလှူရှင်ဒါယကာ၊ ဒါယိကာမ များအနေဖြင့် ရှင်တစ်ပါးလျှင် ငွေကျပ် ၉ဝ,ဝဝဝ နှုန်းဖြင့် ဖုန်း ဝ၉-၄ဝ၂၅၉၈၃၅၁၊ ဝ၉-၄ဝ၂၅၇၆၄၉၉ တို့သို့ ဆက်သွယ် လှူဒါန်းနိုင်ကြောင်း သိရပါတယ်။ (NVS 004)