ကျန်းမာရေးဝန်ကြီးဌာန၊ ပြည်သူ့ကျန်းမာရေးဦးစီးဌာနမှ ကလေးများတွင်ပိုမိုဖြစ်ပွားတတ်တဲ့ အသည်းရောင် အသားဝါ(အေ)ရောဂါ ကြိုတင်ကာကွယ်ရေး သတိပေးချက်ကိုထုတ်ပြန်ခဲ့ပါတယ်။ အသည်းရောင်အသားဝါ(အေ)ရောဂါက အသည်းရောင်အသားဝါဗိုင်းရပ်စ်(အေ) ရောဂါပိုးကြောင့် ဖြစ်ပွားပြီး အလွယ်တကူကူးစက်တတ်ကာ ကပ်ရောဂါအသွင်ဖြစ်ပွားနိုင်ပြီး အသက်အရွယ်မရွေးဖြစ်ပွားလေ့ရှိသော်လည်း ကလေးများတွင် ပိုမိုဖြစ်ပွားတတ်တယ်လို့ သိရပါတယ်။ အဆိုပါရောဂါက ရောဂါပိုးရှိသူခန္ဓာကိုယ်မှထွက်သော အညစ်အကြေးများပါရှိနေတဲ့ မသန့်ရှင်းသော အစားအသောက်များကို စားသောက်မိခြင်း၊ အသည်းရောင်အသားဝါ (အေ) ရောဂါပိုးရှိသူလူနာနှင့် အနီးကပ်ထိတွေ့ခြင်း၊ ပြုစုခြင်းတို့နဲ့ ကူးစက်ဖြစ်ပွားနိုင်တယ်လို့ အသိပေးခဲ့ပါတယ်။ ရောဂါကူးစက်ဖြစ်ပွားပါက ဖျားခြင်း၊ မောပန်းနွမ်းနယ်ခြင်း၊ အစားအသောက်ပျက်ခြင်း၊ ပျို့အန်ခြင်း၊ ဗိုက်အောင့်ခြင်း၊ အသားဝါခြင်း၊ မျက်လုံးဝါခြင်း၊ ဆီးအရောင်ရင့်ခြင်း၊ ဝမ်းအရောင်ဖျော့ခြင်းနှင့် အဆစ်အမြစ်များ နာကျင်ကိုက်ခဲခြင်းတို့ဖြစ်ပေါ်ပြီး ပြင်းထန်စွာအသည်းရောင်ပါက ရုတ်တရက်အသည်းပျက်စီး၍ အသက်အန္တရာယ် ထိခိုက်နိုင်ကြောင်း သတိပေးခဲ့ပါတယ်။ ဒါ့အပြင် အသည်းရောင်အသားဝါ(ဘီ) (သို့) (စီ) ရောဂါပိုးရှိသူများ၊ အိပ်ခ်ျအိုင် ဗွီပိုးရှိသူများတွင် ရောဂါဖြစ်ပွားပါက ပိုမိုပြင်းထန်စွာခံစားရနိုင်ကြောင်း သိရပါတယ်။ အဆိုပါရောဂါမဖြစ်ပွားစေရန် တစ်ကိုယ်ရေသန့်ရှင်းရေး သတိပြုရမှာဖြစ်ကာ လက်ကိုဆပ်ပြာနဲ့ စနစ်တကျ ဆေးကြောခြင်း၊ အစားအစာများကို မကိုင်တွယ်မီနှင့် မချက်ပြုတ်မီ၊ အစာမစားမီနှင့် အိမ်သာအသုံးပြုပြီးတိုင်း ပြုလုပ်ရမှာဖြစ်ပြီး အစားအစာများကို မချက်ပြုတ်မီသန့်ရှင်းသောရေနဲ့ စင်ကြယ်စွာဆေးကြောရမည်ဖြစ်ကာ ဆူပွက်သည်အထိကျိုချက်ထားသည့်ရေ (သို့) ရေသန့်စင်ဆေးပြားအသုံးပြုသန့်စင်ထားသည့်ရေ(သို့) FDA အသိအမှတ်ပြုရေသန့်ကို သောက်သုံးရမည်ဟု အသိပေးခဲ့ပါတယ်။ ထို့အတူ အစားအစာများအား အစိမ်းစားသုံးခြင်းမှ ရှောင်ကြဉ်ရမှာဖြစ်ပြီး ယင်နားစာများကို စားသုံးခြင်းတို့ကို ရှောင်ကြဉ်ရမည်ဖြစ်ကာ အိမ်သာနှင့် မိလ္လာကန်များ ယိုစိမ့်မှုမရှိစေရန်သတိပြု၍ ယင်လုံအိမ်သာသုံးစွဲရမှာ ဖြစ်ပါတယ်။ ဒါ့အပြင် ရောဂါကူးစက်ပြန့်ပွားမှုမှ ကာကွယ်ရန် အစားအသောက်ရောင်းချသူများမှာ ရောဂါဖြစ်ပွား ပါက အရေပြားနှင့်မျက်သားဝါပြီးနောက် အနည်းဆုံး ၁၀ ရက်ကြာသည်အထိ အစားအသောက် ကိုင်တွယ်ရောင်းချ ခြင်းအား ရပ်နားထားရမည်ဖြစ်ပြီး ဖျားခြင်း၊ အရေပြားနှင့် မျက်သားဝါခြင်းစသည့် အသည်းရောင်အသားဝါ(အေ) ရောဂါလက္ခဏာများဖြစ်ပေါ်လာပါက နီးစပ်ရာကျန်းမာရေးဌာနသို့ အမြန်ဆုံးသွားရောက်ပြသရမယ်လို့ ပြည်သူ့ ကျန်းမာရေးဦးစီးဌာနက သတိကြေညာထားပါတယ်။ (NVS 004)