၁၉၂၄ ခုနှစ်ခန့်မှာ တည်ဆောက်ခဲ့သည်ဟု ခန့်မှန်းရသော ရန်ကုန်တိုင်းဒေသကြီး၊ ကျောက်တံတားမြို့နယ်၊ ဗိုလ်ချုပ်လမ်းရှိ ဝဇီရာရုပ်ရှင်ရုံကို မြန်မာနိုင်ငံ၏ ဂုဏ်ပြုခံရုပ်ရှင်ရုံ (Red Carpet Cinema) အဖြစ် ထားရှိဆောင်ရွက် ရန် လိုအပ်တဲ့ ပြုပြင်မွမ်းမံမှုများ ဆောင်ရွက်လျက်နေတယ်လို့ သိရပါတယ်။ သက်တမ်းအားဖြင့် နှစ်ပေါင်း ၉၀ ကျော်ခန့်ရှိပြီဖြစ်သော အဆိုပါ ဝဇီရာရုပ်ရှင်ရုံဟာ ၁၆ ရာစုမှ ၁၈ ရာစု အတွင်းရှိ ပြင်သစ်ဗိသုကာအသွင်အပြင်များ ပေါင်းစပ်ထားတဲ့ Beaux Arts ဗိသုကာလက်ရာပုံစံဖြစ်ကာ ရုပ်လုံးရုပ်ကြွများနဲ့ တန်ဆာဆင်ထားပါတယ်။ ဝဇီရာရုပ်ရှင်ရုံရဲ့ မူလအမည်မှာ New Excelsior ရုပ်ရှင်ရုံဖြစ်ပြီး ၁၉၄၂ ခုနှစ်ခန့်မှာ အေဝမ်းရုပ်ရှင်ရုံအဖြစ် လည်းကောင်း၊ ၁၉၆၈ ခုနှစ်တွင် ဝဇီရာရုပ်ရှင်ရုံအဖြစ်လည်းကောင်း အမည်များပြောင်းလဲခဲ့တယ်လို့ သိရပါတယ်။ ဆူးလေစေတီတော်အနီး ရန်ကုန်မြို့ရဲ့ အချက်အချာကျတဲ့နေရာမှာ တည်ရှိနေသဖြင့် ရုပ်ရှင်လုပ်ငန်းများကို သာမက အနုပညာနှင့်ဆက်စပ်တဲ့ အခြားလုပ်ငန်းများအားလုံးကို ဆောင်ရွက်နိုင်တဲ့ အကောင်းဆုံးနေရာတစ်ခုဖြစ်တဲ့အပြင် ရန်ကုန်မြို့သို့ လာရောက်လည်ပတ်တဲ့ ကမ္ဘာလှည့်ခရီးသွားများကို မိမိတို့ တိုင်းရင်းသားလူမျိုးများ၏ ရိုးရာယဉ်ကျေးမှု အနုပညာများ၊ မြန်မာတို့၏ ယဉ်ကျေးမှုအကအလှပသာဒများဖြင့် ဖျော်ဖြေတင်ဆက်၍ မိမိတို့၏ ယဉ်ကျေးမှုတန်ဖိုး များ မြင့်မားပြန့်ပွားအောင် လုပ်ဆောင်နိုင်မှာ ဖြစ်တယ်လို့ သိရပါတယ်။ ဝဇီရာရုပ်ရှင်ရုံကြီးကို ပြင်ဆင်ထိန်းသိမ်းပြီးပါက ဂုဏ်ပြုခံရုပ်ရှင်ရုံအဖြစ်သာမက ပြဇာတ်၊ ဇာတ်သဘင်၊ ရုပ်သေး၊ အက၊ ဂီတပွဲ၊ ဆွေးနွေးပွဲ၊ အစည်းအဝေးများ၊ စတူဒီယိုနှင့် အနုပညာဖန်တီးနိုင်တဲ့ နေရာတစ်ခုအဖြစ် ဆောင်ရွက်နိုင်ရန် ရည်ရွယ်ထားတဲ့အပြင် နိုင်ငံတကာရုပ်ရှင်ပွဲတော်များ၊ ရုပ်ရှင်နှင့်ပတ်သက်တဲ့ အမှတ်တရပွဲများ၊ Memory Film Festival ကဲ့သို့ပွဲတော်များ ကျင်းပခြင်း၊ ပြည်ပခရီးသွားဧည့်သည်များ ရှေးဟောင်းအမွေအနှစ်ပြတိုက် တစ်ခုအဖြစ်လည်ပတ်ရန် နေရာတစ်ခုအဖြစ် ဖန်တီးခြင်း၊ စနေ၊ တနင်္ဂနွေနေ့များတွင် ရှေးဟောင်းဇာတ်ကားများ ပြသ ခြင်း၊ ရုပ်သေးပွဲများပြသခြင်း၊ ရုပ်ရှင်နှင့်ပတ်သက်တဲ့ပြခန်းများ ပြသခြင်းတို့ကိုပါ ဆောင်ရွက်သွားမယ်လို့ သိရပါတယ်။ (NVS 004)