မတ်လအတွက်ထုတ်ပြန်သည့် ပြည်ပပို့ဆန်အုပ်စု ဆန်ရည်ညွှန်းဈေးများ အနည်းငယ်ကျဆင်း
02 Mar
၂၀၂၅ ခုနှစ်၊ မတ်လအတွက် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနက သတ်မှတ်ထုတ်ပြန်တဲ့ ပြည်ပတင်ပို့သည့် ဆန်ကြမ်းအုပ်စုဝင် ဆန်ရည်ညွှန်းဈေးနှုန်းများမှာ ဖေဖော်ဝါရီလထက် အနည်းငယ်စီကျဆင်းခဲ့ပါတယ်။ ပြည်ပတင်ပို့တဲ့ ဆန်ကြမ်းအုပ်စုဝင် ဧည့်မထနဲ့ ငစိန် စတဲ့ အမျိုးအစားများအတွက် ၁၀၈ ပေါင် ၂၄ ပြည် တစ်အိတ်လျှင် ဖေဖော်ဝါရီလကထက် ကျပ် ၂,၀၀၀ ကျဆင်းခဲ့ပါတယ်။ ပြည်တွင်းစားသုံးမှုရှိတဲ့ အရည်အသွေး သင့်တင့်ကောင်းမွန်တဲ့ ဆန်အုပ်စုများမှာ တစ်အိတ်ကို ကျပ် ၁,၀၀၀ ကျဆင်းပြီး ပေါ်ဆန်းအုပ်စုဝင်ဆန်တွေဖြစ်တဲ့ ဧရာဝတီပေါ်ဆန်း၊ ခွံနီနဲ့ ပေါ်ကျွဲ ဆန်များမှာ ဈေးနှုန်းအပြောင်းအလဲမရှိတာဖြစ်ပါတယ်။ စီးပွားရေးနဲ့ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနက သင့်တင့်မျှတတဲ့ ဆန်ရည်ညွှန်း ဈေးနှုန်းများကို လစဉ်သတ်မှတ်ထုတ်ပြန်ပေးလျက်ရှိပြီး အခုလိုလစဉ်ထုတ်ပြန်တဲ့ ဆန်ရည်ညွှန်းဈေးနှုန်းများကို စည်းကမ်းချက်တွေနဲ့အညီရောင်းချရန်၊ ဈေးနှုန်းမြှင့်တင်ရောင်းချခြင်းနဲ့ အရည်အသွေးမမှန်မကန် ရောင်းချပါက အရေးကြီးကုန်စည်နဲ့ဝန်ဆောင်မှုဥပဒေ ပုဒ်မ ၅ နဲ့အညီ အရေးယူဆောင်ရွက်သွားမည်ဖြစ်ကြောင်း ထုတ်ပြန်ထားရှိပါတယ်။ (NVS 004)
